Galicia Ártabra Digital Noticias de Ferrol y la comarca de Ferrolterra.
O pleno da Deputación da Coruña decidirá a incorporación do seu dominio ao espazo .gal que suporá modificacións na web, nos enderezos electrónicos mais tamén na sede electrónica do organismo. A Deputación pasará a identificarse na súa presenza electrónica do dicoruna.es a dacoruna.gal
A orde do día do pleno que se reunirá este venres día 6 de novembro inclúe a modificación da ordenanza xeral da administración electrónica da Deputación Provincial da Coruña polo que a identificación dixital dicoruna.es pasará a ser dacoruna.gal. A modificación afectará non só ao correo electrónico senón tamén á páxina web e á sede electrónica, o espazo dixital a través do que se desenvolven ás tramitacións administrativas.
A Deputación incorpora así o seu dominio á identificación galega .gal mais na mudanza galeguízase tamén o nome co que se presenta no ámbito dixital do “dicoruna” a “dacoruna”.
A ordenanza modifica a identificación da presenza electrónica que será operativa unha vez rematada a tramitación pertinente, un proceso que é máis complexo no caso da sede electrónica. A Deputación estaría en disposición de emitir de inmediato correos co dominio .gal mais habilitarase un periodo de transición en que estarían operativas as dúas fórmulas.
