O BNG afirma que Ciudadanos quere que o galego deixe de ser língua oficial do Concello

O Bloque Nacionalista galego de Ferrol expresou na mañá deste venres o seu rotundo rexeitamento á moción que vai presentar para o seu debate no Pleno do próximo xoves o grupo municipal de Ciudadanos «relativa á adopción de medidas oportunas para restablecer a situación de legalidade vulnerada pola aprobación da Ordenanza de normalización lingüística do 27 de xuño de 1997». Con esta moción o que se pretende é derrogar varios artigos desta ordenanza baixo a desculpa dunha suposta e falsa “imposición do galego” entre eles derrogar que o galego deixe de ser o idioma oficial do Concello de Ferrol.

Eva Espiñeira, concelleira do BNG, afirmou que «con esta proposta Ciudadanos pretende converter á vítima en verdugo», e situou esta iniciativa na liña de asociacións como Galicia Bilingüe, «asociación que se constituíu fundamentalmente co obxectivo de inventarse unha suposta discriminación do español en Galiza, cando a realidade é totalmente a contraria«. Afirmou que na Galiza si que existe realmente un conflito lingüístico no noso país, pero non nos termos que presenta Ciudadanos nesta moción.

O BNG sinala que se as intencións fosen boas, no sentido de acadar unha ideal igualdade entre o galego e castelán, Ciudadanos estaría a reclamar máis usos sociais e públicos para o galego.

A concelleira do BNG, Eva Espiñeira, indicou que «a realidade paralela e inventada sobre a imposición do galego non ten nada que ver coa realidade existente. A actual situación do galego é cada vez máis dramática, e os datos móstrannos que o monolingüismo en castelán segue medrando entre os galegos e galegas, mentres a porcentaxe de nenos e nenas que non falan nunca o galego incrementouse nos últimos anos en 18 puntos. Só un 13% dos nenos se expresan en galego».

O BNG lembroulle ao grupo municipal de Ciudadanos que «a verdadeira imposición son as políticas educativas do Estado español desenvolvidas de maneira cómplice pola Xunta, incapaz de respectar a diversidade lingüística. As consecuencias son terribles para o galego: imponse o castelán e faise desaparecer paulatinamente a lingua galega do sistema educativo. E todo isto, coas dramáticas consecuencias na perda de competencias lingüísticas para moitos nenos e nenas. A imposición lingüística lidéraa o PP que non respecta nin sequera a nosa toponimia e a deturpa unha e outra vez».

O BNG indica que nesta proposta Ciudadanos di que está a favor de que o galego se normalice, pero pola contra pretende recortarlle aínda máis os poucos dereitos que ten.

Na súa proposta Ciudadanos pide que se supriman até 6 artigos da actual Ordenanza de Normalización Lingüística do Concello de Ferrol entre eles o que indica que o galego, como lingua propia de Galiza, é o idioma oficial do Concello de Ferrol; Que as actuacións administrativas realizadas en galego en territorio municipal terán plena validez e eficacia.

Cumprimento da Ordenanza Municipal por parte do goberno local

O BNG considera que o actual goberno municipal de Ferrol carece dun compromiso real e efectivo cao promoción da nosa lingua e o instou a desenvolver unha acción decidida para conseguir unha normalización real da lingua galega no concello de Ferrol emprezando por cumprir a Ordenanza de Normalización lingüística e a desenvolver o Plan Xeral de Normalización da lingua Galega tal e como se comprometera ao inicio do mandato.

Así mesmo desde o BNG censuraron o comportamento diglósico do alcalde de Ferrol quen hai uns días inauguraba en español, un congreso sobre a industria naval celebrado na cidade e repetía a mesma actittude na súa clausura.