TEGA anuncia na súa festa do río que vai dar un paso máis en política

Terra Galega Narón celebrou este domingo e no entorno do muíño de Pedroso a tradicional Festa do Río, unha convocatoria que reuniu a unhas seiscentas persoas que gozaron dunha comida de confraternidade e unha xornada festiva que comezou a desenvolverse sobre as 14.00 horas e que se prolongou durante boa parte da tarde. A actuación musical da orquestra Xente Nova abriu esta cita antes das intervencións que realizaron a portavoz de TEGA en Narón e primeira tenente de alcalde, Marián Ferreiro; o alcalde naronés, José Manuel Blanco, e o secretario xeral de Terra Galega, Guillermo Sánchez Fojo. Os tres representantes da formación en Narón estiveron acompañados polo resto de edís de TEGA na localidade e tamén por exedís do partido, militantes e simpatizantes, aos que agradeceron a súa asistencia, ao igual que aos compañeiros de partido chegados dos concellos de Arteixo, Laracha e Coristanco, este último representado polo seu alcalde, Amancio Lavandeira.

A portavoz de TEGA en Narón, Marián Ferreiro, abriu o turno de intervencións respaldada polos edís do partido no municipio. Dirixiuse aos asistentes para agradecerlles o apoio acadado pola formación nas urnas cos seus votos o pasado mes de maio, incidindo en que “somos conscientes do voso apoio e estamos orgullosos del” e garantindo que o equipo de Terra Galega corresponderá este respaldo “co noso traballo e dedicación”. Ferreiro asegurou en que as portas do Concello de Narón están abertas para todos os veciños e veciñas  e subliñou que o traballo conxunto do equipo de TEGA co da veciñanza permitirá que “Narón vaia a máis”, tal e como reivindicou o partido na pasada campaña electoral. Antes de rematar a súa intervención, a portavoz de Terra Galega dirixiu unhas palabras ao alcalde, José Manuel Blanco, ao que agradeceu o feito de que continúe “liderando un equipo que se sinte moi orgulloso da súa persoa” e tamén “a súa dedicación e constancia” no día a día do seu traballo á fronte da corporación local naronesa.

        A continuación, Ferreiro cedeulle a palabra a Blanco, que se dirixiu aos alí presentes recordando que pese ás falsas acusacións realizadas por algún partido na campaña electoral do pasado mes de maio, “logramos ser a formación política que máis subiu en votos nas eleccións locais de Narón e tamén logramos gañar por primeira vez en todas as mesas electorais do concello”. O rexedor local apuntou que a Festa do Río de hoxe “é un motivo de celebración” e destacou o traballo da xente máis nova que se está incorporando ao equipo de Terra Galega en Narón. “Con nós e con eles imos seguir gobernando Narón e seremos o partido que continúe levando a este concello polo camiño do desenvolvemento, tal e como vimos facendo dende hai moitos anos”. A cita de hoxe serviu para iniciar a campaña electoral de 2019 porque, subliñou Blanco “nós non somos un partido dos que traballan nos últimos quince días antes de ir a votar, senón que traballamos día a día para cumprir os compromisos adquiridos cos veciños e veciñas de Narón”.

O secretario xeral de TEGA, Guillermo Sánchez Fojo, avanzou que “nun mes comezarán a xurdir moitas cousas novas en política”, explicando que a actual situación e o camiño destrutivo das políticas do Partido Popular, “lévannos a deixar de ser só un partido de marcado carácter municipal para dar un paso máis e impedir que o PP continúe acabando cos nosos dereitos e aplicando recortes en detrimento da sanidade, a educación, a cultura e a economía”. Sánchez Fojo explicou que “o BNG e outras formacións puxéronse en contacto con nós para crear unha plataforma de cara ás vindeiras eleccións e nós imos sumarnos porque non podemos esquecer o dano que nos fixo nos últimos catro anos o goberno do Partido Popular”.

Finalizadas as intervencións, os asistentes participaron nunha comida de confraternidade que tivo lugar baixo unha carpa instalada para a ocasión na área recreativa de Pedroso. A orquestra Xente Nova continuou amenizando a xornada pola tarde, animando aos asistentes a gozar desta tradicional cita festiva que TEGA organiza anualmente en Narón.