O BNG pide axuda para que os montes do Chá sexan declarados de man común

O BNG demandou este martes, día 28, ao goberno municipal que apoie e poña a disposición dos veciños e veciñas de Brión e Doniños os recursos necesarios para que os Montes do Chá sexan declarados de man común, logo da decisión do Xurado Provincial de Montes de desestimar a demanda interposta por este colectivo veciñal.

Tras a reunión mantida polo Xurado Provincial de Montes o pasado día 10 de xullo, este resolveu desestimar a demanda interposta polos veciños e veciñas de Brión e Doniños e non clasificar os montes do Chá como montes veciñais en man común. Unha decisión que desde o BNG non compartimos e da que cremos que o Concello de Ferrol, por medio do seu goberno local, e avalada pola resolución plenaria do pasado día 2 de xullo debe traballadar do lado dos veciños e veciñas para devolverlles a titularidade destes Montes.

O BNG demanda do goberno local a posta a disposición dos servizos municipais, tanto técnicos como xurídicos, para colaborar cos veciños e veciñas na resolución dun problema político produto da usurpación destes montes durante a ditadura.

O acordo plenario, promovido polo BNG, o pasado 2 de xullo, no que o Concello de Ferrol recoñecía oficialmente que os montes do cha son dos veciños e veciñas non pode ficar nun mero posicionamento político senón que debe servir de base para acadar estes obxectivos e para que logo de anos de reclamacións, este colectivo veciñal poida comprobar como o seu esforzo colectivo serviu para mudar a situación e que sexan atendidas as súas reivindicacións.