Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista ven a instar ao goberno local a cumprir os compromisos plenarios acordados por unanimidade no pleno de agosto do ano pasado en materia de accesibilidade, a instancias dunha moción do Grupo Municipal Socialista.
Destacamos que esta semana se cumpriu o 23 aniversario do Centro de Atención ás Persoas con Discapacidade Física (CAMF), centro de referencia que presta a atención necesaria ás persoas con Discapacidade Física, que atopan serias dificultades para acadar a súa integración laboral ou de ser atendidas no seu entorno familiar. Dentro das prioridades para as persoas do centro é a falta de accesibilidade na estrada de Catabois no tramo comprendido entre a rotonda e o hospital Novoa Santos, cuestión reflectida na moción socialista e que aínda que a prioridade era máxima á hora de aprobala moción esta actuación atópase sen desenvolver.
Así mesmo, outro dos compromisos plenarios asumidos polo Goberno Local era a convocatoria do Consello das Persoas con Diversidade Funcional co obxectivo de establecer as prioridades en materia de supresión de barreiras e promoción da accesibilidade, e que fixase como obxectivos, ademais do anterior, a elaboración dun Plan de Accesibilidade do Concello de Ferrol, que propiciase a eliminación de barreiras arquitectónicas e que contemple a colocación de beirarrúas modulares a nivel para facilitar a accesibilidade no transporte público nos lugares que se estime necesario, como son, entre outros, as paradas de urxencias do Hospital Xeral; así como a redacción e aprobación dunha ordenanza de accesibilidade do Concello de Ferrol, adaptada á normativa actual. “Moitas tarefas pendentes e falta de vontade do goberno para levalas a cabo” resumen os socialistas.
Outra das actuacións pendentes é a apertura do proceso de elección do valedor/a das persoas con diversidade funcional conforme dispón o Regulamento.
Tamén pedíase o incremento da partida destinada a bonotaxis para facilitar a mobilidade das persoas con diversidade funcional, e a posta en marcha do proxecto, xa previsto no goberno socialista, de colocar ascensor na piscina de Caranza e dotala, xunto coa da Malata de vestiarios e duchas accesibles para todas as persoas. Por todo iso, urximos ao goberno local a poñer en marcha estas actuacións, instándoo a cumprir o compromiso plenario acadado por unanimidade.
