Exposición de traballos das amas de casa de Neda

A Casa das Palmeiras de Neda acollerá este venres, día 28,  a inauguración dunha exposición promovida pola Asociación de Amas de Casa da localidade. Será a partires das 19 horas con entrada libre e gratuíta. Asistirán o alcalde, Ignacio Cabezón Lorenzo, e a concelleira de Promoción Turística, Montse Rico. A mostra tamén poderá visitarse o sábado, en horario de mañá (de 11 a 13 horas) e de tarde (de 17 a 20 horas).

O público que visite a exposición poderá apreciar os traballos que realizan as mulleres da asociación nos obradoiros que organiza a entidade durante o curso. Auténticas obras de arte na técnica de bolillos, pintura, manualidades e bordado. Entre outros obxectos, pezas de mantelería, roupa de cama, cadros ao óleo… Así, dende a asociación tamén se avanza que retomarán os talleres no mes de outubro e que, en setembro, abrirán o correspondente prazo de inscripción para que as persoas interesadas poidan anotarse nas diferentes actividades.