Galicia Ártabra Noticias de Ferrol y la comarca de Ferrolterra.
A ANPA valora moi positivamente a participación na concentración celebrada esta jueves, coa presenza de representantes do BNG, Ferrol en Común e da Asociación Veciñal de Canido, e co apoio de FEANPAS.
A ANPA do CEIP Juan de Lángara valora moi positivamente a resposta da comunidade educativa ao peche humano simbólico celebrado na mañá deste xoves para reclamar unha solución á entrada reiterada de xabaríns no recinto escolar e ao deterioro do peche perimetral.
Na mobilización participaron membros da comunidade educativa e estiveron presentes representantes do Bloque Nacionalista Galego (BNG), Ferrol en Común e da Asociación Veciñal de Canido. A iniciativa contou tamén co apoio de FEANPAS, ao que a asociación quere expresar o seu agradecemento.
Desde a ANPA destacan que a concentración serviu para facer visible unha preocupación compartida e trasladar unha mensaxe clara ás administracións: o alumnado necesita un centro seguro e cunhas instalacións en condicións adecuadas.
«Estamos moi satisfeitos coa resposta de toda a comunidade educativa. Quedou claro que é unha preocupación compartida por todos e que todos queremos o mesmo: un colexio seguro, coas instalacións en boas condicións, onde os nenos e nenas poidan aprender e desfrutar dos espazos que teñen«, sinalaron desde a asociación.
O deputado no Parlamento Galego e futuro candidato á alcaldía de Ferrol polo BNG, Mon Fernández, achegouse para falar coa ANPA, coñecer de primeira man a situación, “os traballos de mantemento e limpeza por parte do goberno local son fundamentais para que non atopen zonas onde habitar e criar as súas camadas, mais tamén a Xunta debe tomar medidas xa que ten as competencias para o control da fauna salvaxe”.
A ANPA quixo poñer en valor o significado educativo da concentración, na que as familias defenderon a importancia de coidar os espazos comúns, respectar os animais e reclamar de maneira pacífica aquilo que consideran xusto.
«Pensamos, ademais, que este tipo de mobilizacións son tamén unha forma de educar. Estamos ensinándolles aos nenos e nenas a coidar o que é de todos, a respectar os animais, que tampouco son responsables desta situación, e a defender e reclamar aquilo que consideran xusto».
A asociación insiste en que o problema non son os animais, senón a falta dunha protección perimetral eficaz que impida o seu acceso ás instalacións escolares. A entrada reiterada de xabaríns, detectada mesmo en momentos de acceso do alumnado ao comedor, xera preocupación pola seguridade e ocasiona danos continuos nas zonas verdes. Esta situación dificulta o mantemento do recinto e afecta tamén a espazos utilizados por entidades deportivas, como o Club de Rugby Ferrol.
A ANPA lembra que o pleno municipal do 25 de xuño aprobou por unanimidade unha moción que recollía a renovación integral e urxente do peche perimetral, xunto con medidas de recuperación e mantemento dos espazos exteriores. Porén, case cinco meses despois, o problema continúa sen resolverse. Desde a asociación reclaman unha resposta coordinada das administracións competentes.
A ANPA non descarta novas mobilizacións
Tras a concentración, a asociación dirixe a súa petición tanto ao Concello de Ferrol como á Xunta de Galicia, para que se dea unha solución definitiva á situación; «Agora agardamos que o Concello recolla a mensaxe, o Concello, a Xunta ou ambos, e que se dea unha solución definitiva a un problema». Porque, «quedou claro que non estamos pedindo nada extraordinario».
A ANPA insiste en que non se pode normalizar a presenza diaria de xabaríns dentro dun centro educativo e reclama medidas inmediatas para garantir a seguridade do alumnado. «Non é normal que cada día nos atopemos con xabaríns dentro do colexio e, polo tanto, esiximos que se dea unha resposta de forma inmediata ou continuaremos con accións deste tipo».
A asociación agradece novamente a participación e o apoio recibido, e reitera que a súa demanda é tan sinxela como necesaria: «un colexio seguro, coidado e nas condicións que merece toda a comunidade educativa».
