Inscrición aberta para a tradicional excursión a Portugal que promove o Concello de Neda

O Concello de Neda (A Coruña) abre este martes o prazo para anotarse na tradicional excursión que organiza cada ano poucos días antes do Nadal. A viaxe sociocomunitaria, cunha duración de un só día, desenvolverase o mércores 16 de decembro, e incluirá, como vén sendo habitual, a visita á Valença do Minho, onde ademais da feira as persoas participantes poderán desfrutar do enclave turístico e comercial da Fortaleza.

A través desta proposta, a veciñanza nedense terá a oportunidade de coñecer a citada vila raiana, de descubrir unha das grandes fortificacións do país veciño e, como non, de facer as típicas compras nas súas tendas. Sairase da praza da Casa Consistorial ás 8:00 horas. O regreso está previsto para as 21:00 horas.

Para participar haberá que anotarse nas oficinas de Servizos Sociais. As prazas para a excursión son limitadas e asignaranse por orde de inscrición. O prezo da actividade é de 20 euros, e non inclúe o xantar. A partir do 3 de decembro, as cancelacións serán non reembolsables.