Galicia Ártabra Noticias de Ferrol y la comarca de Ferrolterra.
O Concello de Neda sumarase, un ano máis, á conmemoración do Día do orgullo neofalante, que se celebra o 1 de outubro, coincidindo coa data de nacemento do cantautor Andrés do Barro, e ten como obxectivo gañar falantes e espazos de uso para o galego.
E farao regueifando e cun contacontos para o público infantil. Co apoio da Consellería de Cultura, Lingua e Xuventude, a administración local traerá ao IES Fernando Esquío “Quen inventou o rap?”.
Trátase dun espectáculo protagonizado por Lupe Blanco, unha das voces claves na expansión actual da regueifa, esas disputas dialécticas improvisadas e en verso que forman parte da nosa tradición oral. Sen dúbida, un antecedente de manifestacións musicais actuais como o rap.
A proposta, dirixida ao alumnado de secundaria do centro, e prevista para o 29 de setembro, a regueifeira reta con versos rimados e creados no momento, combinando enxeño, ritmo e complicidade co público. O segundo espectáculo vai destinado ao público infantil, e terá lugar na biblioteca municipal o sábado 3 de outubro, a partir das 12:30 horas.
“Onde nace a lingua” é o título do contacontos que traerá Marta Ortiz, concibido como “un canto coral ao galego e á nosa cultural, un mosaico práctico de recursos vivos dos que nos dota a tradición oral”. Non faltarán as adiviñas, os trabalinguas e os contos rimados, nos que os nenos e nenas xogarán co idioma.
O Concello de Neda conta cunha achega de 1.198 euros, no marco das axudas autonómicas para o desenvolvemento de programas e accións de dinamización lingüística para impulsar estas dúas actividades programadas ao redor do Día do orgullo neofalante, que conmemora o nacemento do cantautor ferrolán Andrés do Barro, primeiro artista que conseguiu un éxito de masas en España cantando en galego.
