O BNG entende como unha burla a reunión «da comisión de seguimento do dique flotante»

O Consello comarcal do BNG enviou aos medios de comunicación a seguinte nota en relación á reunión de hoxe luns  sobre o dique flotante: «Perante a reunión da denominada “comisión de seguimento” do dique flotante – da que o BNG anunciara o pasado mes de Decembro a retirada do alcalde de Mugardos – que se vai celebrar o vindeiro luns, o BNG reitera a súa crítica ao formato escollido polo goberno do estado, Xunta e alcaldía de Ferrol para tentar ocultar a falta de compromiso real para o dique flotante e, en definitiva, para fixar unha folla de ruta clara na defensa do sector naval da ría.

Logo de catro reunións celebradas, o PP – sexa via SEPI ou gobernos central, galego ou ferrolán – segue nunha senda de engano permanente ao conxunto da comarca, que vai paralela ao desmantelamento progresivo e práticamente total da industria auxiliar; e que xa ameaza claramente ao plantilla da principal. Desde a chulesca visita do presidente da SEPI en Abril do pasado ano, a utilización dos “contratos pantasma” con PEMEX por unha banda, e a utilización da “comisión de seguimento” como manobra de distración, foron unha burla ao conxunto da comarca; que esixen un mínimo de dignidade para non participar nesta noxenta operación.

O BNG cualifica de chamativo que neste debate se escape como do lume do que, paradoxalmente, é o transfondo da situación actual do naval na ría; que non é outro que o mantemento do veto á construción naval convencional. Así se explica o acontecido coa polémica das declaracións institucionais – o papel pode con todo – do pasado ano, que o PP utilizou como un paraugas para esvair as súas responsabilidades na actual situación.

Neste contexto desde o BNG, fuxindo da utilización partidista que outros están a facer do naval, entende que só cabería agora unha última posibilidade de que o PP concretáse un compromiso real a respecto do naval; incluindo unha partida específica nos orzamentos da Xunta agora en debate, e prantexando unha folla de ruta con iniciativas políticas para o levantamento do veto e a conseguinte dotación de carga de traballo. Para iso, desde o Grupo parlamentar introducíronse dúas emendas ao documento orzamentario nas que se propón unha partida de 25.000.000 euros para o dique flotante no ano 2013 e con carácter plurianual como compromiso adquirido para con esta comarca na cofinanción do devandito dique; ademáis doutra partida de 2.000.000 de euros para o centro de reparacións da ría de Ferrol, algo imprescindíbel para a aposta decisiva para a área de reparacións.

En paralelo, o mesmo luns o Consello Comarcal do BNG analizará as iniciativas políticas e sociais a desenvolver para artellar un amplo movimento da cidadanía da comarca a prol do levantamento do veto á construción naval na ría, que actúe como un elemento de presión – e non de contención – fronte á incompetencia do goberno do estado, a inactividade da Xunta e a complicidade do concello de Ferrol.»