Galicia Ártabra Noticias de Ferrol y la comarca de Ferrolterra.
As propostas, dirixidas á rapazada de 3 a 12 anos, achegan o consumo responsable e o lecer activo a través de xogos e dinámicas participativas.
A biblioteca municipal de Narón acolle o próximo venres 28 de agosto dúas actividades gratuítas enmarcadas no programa «Veráns de Lecer Consumo», unha iniciativa da Xunta de Galicia impulsada a través do Instituto Galego do Consumo e da Competencia (LCG).
As propostas, dirixidas á rapazada de 3 a 12 anos, teñen como obxectivo achegar aos máis pequenos cuestións relacionadas co consumo responsable, os dereitos das persoas consumidoras e usuarias e o lecer activo, sempre a través de dinámicas lúdicas e participativas.
Dúas propostas segundo idades
Ás 11:00 horas terá lugar «Xogueteando: un lecer diferente!», unha actividade pensada para nenos e nenas de 3 a 6 anos baseada en xogos alternativos e colaborativos, na que descubrirán formas de practicar un consumo responsable e gozar dun lecer activo. A proposta tamén incidirá na importancia dos xoguetes seguros e sen riscos.
Ás 12:30 horas será a quenda de «A xincana do consumo responsable», dirixida a nenos e nenas de 7 a 12 anos. Nesta xincana, os grupos deberán superar diferentes probas relacionadas co consumo responsable, sostible e consciente, ao tempo que se familiarizan cos seus dereitos como persoas consumidoras e usuarias.
Para participar en calquera das dúas actividades é necesario dispor do carné da biblioteca e ter a idade indicada para cada proposta. As reservas de praza poderán realizarse a partir do luns 24 de agosto, ás 18:00 horas, de xeito presencial na propia biblioteca ou a través do teléfono 981 38 21 73, en horario de apertura.
O Concello lembra que todos os nenos e nenas deberán estar acompañados en todo momento por unha persoa adulta.
