Unha unidade móbil de doazón de sangue achegarase a Narón en tres xornadas ao longo desta semana

O Concello de Narón colabora coa Axencia Galega de Sangue, Órganos e Tecidos na campaña especial de verán “Un alento de vida” que busca compensar o descenso estival nas doazóns.

O Concello de Narón súmase un ano máis á campaña especial de doazón de sangue que a Axencia Galega de Sangue, Órganos e Tecidos (ADOS) desenvolve entre o 15 de xuño e o 31 de agosto baixo o lema «Un alento de vida». O obxectivo é sensibilizar a veciñanza sobre a importancia deste xesto solidario nun período especialmente complicado para cubrir as necesidades dos hospitais galegos, que precisan máis de 400 doazóns diarias para atender a súa actividade asistencial.

Unha unidade móbil de ADOS visitará Narón en tres novas xornadas. O mércores, 12 de agosto, estará situada fronte á asociación de veciños Rosa dos Ventos, en Sedes, das 09:45 ás 12:00 horas. O xoves, 13 de agosto, trasladarase a carón do centro de saúde de Narón, onde permanecerá das 09:30 ás 14:30 horas e das 15:30 ás 21:00 horas. E o venres, 14 de agosto, volverá situarse xunto ao centro de saúde, en horario de tarde, das 15:30 ás 21:00 horas.

Pode doar sangue calquera persoa maior de idade e de ata 70 anos, con máis de 50 quilos de peso e sen antecedentes de enfermidades transmisibles polo sangue. O proceso, que dura entre 5 e 7 minutos, é completamente seguro e
non debilita o organismo do doador.

Dende ADOS lembran que cada doazón pode axudar a máis dun paciente, xa que do sangue extráense tres compoñentes —glóbulos vermellos, plasma e plaquetas— que se empregan por separado para tratar dende intervencións cirúrxicas ata enfermidades oncolóxicas ou grandes queimados.

Para máis información sobre os puntos de doazón, pódese consultar a web ados.sergas.gal ou chamar ao teléfono gratuíto 900 100 828.