Esquerda Unida de Narón denuncia deficiencias graves que poñen en risco a seguridade alimentaria no CEIP A Solaina

O comedor do CEIP A Solaina de Narón atópase nunha situación «crítica» que supera a mera falta de mantemento estrutural para converterse nun problema de saúde pública para o alumnado.

Esquerda Unida de Narón denuncia nun comunicado remitido ós medios de comunicación que tras o traballo de campo realizado coa ANPA do centro concluen que as «actuais condicións do servizo impiden garantir a seguridade alimentaria básica, poñendo en perigo especialmente aos menores con alerxias e intolerancias». A problemática é múltiple e de carácter urxente, segùn denuncia a formación naronesa:

Saturación e espazo insuficiente: O comedor é un espazo tan reducido que os alumnos deben compartir as mesas coa zona de almacenamento e manipulación da comida, o que impide manter as distancias e a hixiene necesarias.

Imposibilidade de evitar a contaminación cruzada: Esta falta de espazo físico fai imposible garantir a separación necesaria entre menús, algo vital para os nenos e nenas celíacos ou con outras alerxias graves, existindo un risco constante de contaminación cruzada durante a manipulación e servizo do catering.

Intensidade de uso: O centro conta co programa Madrugadores da Xunta de Galicia, polo que o espazo recibe un uso continuado desde primeira hora da mañá. Esta alta ocupación diaria, sumada á necesidade de organizar a comida en dúas quendas, complica aínda máis a limpeza e a desinfección adecuada das instalacións, multiplicando os riscos para os usuarios.

Xestión operativa deficiente: A falta de separación física entre a cociña e o salón de comedor dificulta gravemente o labor do persoal nunhas instalacións xa de por si masificadas.

Desde Esquerda Unida de Narón, «esixen» á Xunta de Galicia unha solución inmediata. “Non se pode xogar coa saúde dos nosos nenos e nenas”. É imperativo habilitar un espazo que cumpra coas normativas hixiénico-sanitarias vixentes e que garanta que o servizo de comedor sexa seguro para todo o alumnado, incluíndo aqueles con necesidades dietéticas especiais. Todo esto sumado ao resto dos problemas do centro que «xa denunciou o noso grupo con anterioridade», declara EU de Narón.