Galicia Ártabra Noticias de Ferrol y la comarca de Ferrolterra.
Xavier Piñeiro e Luís García conseguiron ouro, e Iván Pérez, Iago López e Alexandre Blanco completaron o medalleiro con pratas e bronces.
A Asociación Deportiva e Cultural Bombeiros Narón, en colaboración co Concello de Narón e co corpo de Bombeiros de Narón integrante do Speis, pechou a súa participación nos XI Xogos Europeos de Policías e Bombeiros, celebrados en Vigo do 9 ao 18 de outubro, cun balance moi positivo en distintas disciplinas deportivas.
A cita, que se organiza cada dous anos, reuniu na cidade olívica a preto de 3.000 profesionais das forzas da orde e das emerxencias procedentes de 40 países.
Os representantes naroneses competiron en carreira vertical, natación, remo indoor, orientación, pentatlón, carreira nocturna, atletismo e bolos, e subiron ao podio tanto en probas individuais como por equipos. A carreira vertical foi a que máis medallas lles deu aos de Narón.
Alexandre Blanco logrou o bronce por equipos na modalidade sen traxe, e Iago López e Luís García sumaron dous bronces cada un, por equipos e na súa categoría de idade, ambos sen traxe. Iván Pérez, pola súa banda, conseguiu un bronce por equipos sen traxe, unha prata na categoría de idade con traxe e outro bronce na categoría de idade sen traxe.
Na auga tamén houbo podio. Xavier Piñeiro gañou o ouro nos 1.500 metros libres de natación, e Iván Pérez engadiu dúas pratas no remo indoor, na proba individual e na de relevos de 500 metros. Luís García, ademais dos bronces en carreira vertical, foi ouro en orientación de media distancia e prata en pentatlón.
Segundo sinalan desde a ADC Bombeiros Narón, estes resultados son froito do esforzo, da preparación e da constancia de profesionais que compaxinan a súa actividade laboral coa práctica deportiva.
