Galicia Ártabra Digital Noticias de Ferrol y la comarca de Ferrolterra.
O Concello de Narón, en colaboración coa entidade DAGA Ferrolterra, integrada na Asociación Galega de Apicultura, organiza unha charla divulgativa con motivo do Día Mundial das Abellas, que terá lugar o próximo 23 de maio no centro cívico de Sedes ás 11:00 horas.
A actividade será impartida polo técnico apícola Rafa Díaz e está aberta a toda a cidadanía, con acceso libre e de balde. Durante a xornada abordarase a tradición apícola en Galicia, poñendo en valor o papel histórico e cultural da apicultura no territorio, así como a súa relevancia actual. A sesión completarase cunha degustación de meles monoflorais galegos e co reparto de publicacións especializadas da Asociación Galega de Apicultura, co obxectivo de achegar coñecemento práctico ás persoas asistentes e fomentar o interese por este sector.
O Día Mundial das Abellas celébrase cada 20 de maio desde o ano 2018, tras a súa proclamación pola Asemblea Xeral das Nacións Unidas en decembro de 2017, a proposta do Goberno de Eslovenia e co apoio de organizacións internacionais do ámbito apícola. A data foi escollida coincidindo co aniversario do nacemento de Anton Janša, pioneiro da apicultura moderna.
Esta conmemoración ten como finalidade sensibilizar á sociedade sobre a importancia das abellas e doutros polinizadores, fundamentais para a biodiversidade e a produción de alimentos, así como promover accións que contribúan á súa protección e á conservación dos seus hábitats.
