Remata en Ferrol a primeira Feira Galega de Artesáns organizados a través de AGA

Este sábado remata en Ferrol a primeira Feira Galega de Artesáns, unha serie de encontros organizados a través da Asociación Galega de Artesáns (AGA) coa colaboración da Fundación Artesanía de Galicia.

A Consellería de Emprego, Comercio e Emigración continúa coa súa aposta pola comercialización do produto artesán galego e pola posta en valor da marca Artesanía de Galicia, desta vez a través dunha colaboración coa Asociación Galega de Artesáns (AGA) para a programación de distintas feiras de artesanía, como a que remata hoxe en Ferrol.

Entre os meses de abril e setembro celebraranse nas catro provincias galegas un total de 12 encontros protagonizados exclusivamente por profesionais inscritos en Artesanía de Galicia. Baixo a denominación de Feira Galega de Artesáns, o obxectivo destes eventos é achegar o produto artesán galego á sociedade, consolidar a marca Artesanía de Galicia, a dinamización cultural, económica e turística de cada zona e ofrecerlles aos artesáns un espazo de venda directa de calidade en diferentes zonas de Galicia.

Canto ao primeiro destes eventos, arrancou o pasado mércores 1 de abril e remata este sábado na Praza da Constitución de Ferrol, en horario de 11,00 a 21,00 horas. Participan 16 obradoiros de Artesanía de Galicia especializados na xoiería, na madeira, no coiro, na bixutería, na cerámica, na sombreirería, na cestería e no téxtil.

Neste encontro participan cocretamente o obradoiro de cestería O carabel ecocestos (Ferrol), o de sombreirería Hana no Boshi (Pontedeume), o de tecido De filo Artesanía (Cedeira), os de marroquinería Chueco (A Coruña) e Art Design Galley (Lugo), obradoiros de bixutería Moira (Valdoviño) e Mónica Fuentes (Ames), o de madeira Néboa na ría (Sada), os de xoiería Zimzelatum (Gondomar), Ana Aguín (Sanxenxo) e Amorei (Soutomaior), o obradoiro Casperlota (Paderne) especializado en xoguetes e tinguido ecoprint, Adanegra (A Guarda) de elaboración de roupa, e os obradoiros de cerámica Ceniza de papel e La Bellota mágica, procedentes de Lugo.

Despois da feira de Ferrol, terán lugar encontros noutras localidades galegas como Padrón —os días 11 e 12 de abril, durante as festas da Pascuilla—, San Sadurniño —o 26 de abril, coincidindo coa súa Feira da Plantación—, Ribadavia —do 1 ao 3 de maio— e Ponteareas —o 5 e 6 de setembro, durante a Feira dos Remedios—.