Galicia Ártabra Noticias de Ferrol y la comarca de Ferrolterra.
A función terá lugar este venres 13 ás 20:30 horas no auditorio da casa da cultura, con entrada de balde e libre ata completar aforo.
O Concello de Valdoviño activa neste 2026 unha nova edición do ciclo municipal de teatro Ven o Venres. O cartel inclúe este mes a representación de «De marzo a marzo» de Opaí Teatro-Canido SDR, este mesmo venres día 13 ás 20:30 horas no auditorio da casa da cultura, con entrada de balde e libre ata completar aforo.
«De marzo a marzo» está dirixida por Cristina Mariño, autora tamén do texto xunto a Carlos Castrillón Doce, e conta cun elenco formado por Carmen Caeiro, Miguel Curveira, Margarita G. Pita, Juani Hernández, Franki Muíño, Luis Pillado, José Piñeiro, Estela Porta, Alexis Sequeiro e Alberto V. Graña.
En 2021, a organización do Dez de Marzo 50 aniversario, propón á compañía ferrolá escribir unha peza teatral para conmemorar os sucesos de 1972 en Ferrol durante as mobilizacións obreiras, que remataron coa morte dos traballadores da Bazán Daniel Niebla e Amador Rey. A partires de aquí comeza un proceso de investigación a través de documentos da época, traballos de diversos historiadores, biografías e, sobre todo das entrevistas persoais a máis de trinta persoas que foron testemuñas ou protagonistas daquelas mobilizacións. Algunhas entrevistas realizáronse de xeito individual e outras a través de reunións vivenciais organizadas pola SRD Canido.
A partir dese traballo, escríbese a obra, que nos sitúa cincuenta anos despois dos sucesos do 10 de marzo de 1972 en Ferrol. Un rapaz ten que facer un traballo sobre o tema para a escola. Os máis vellos da familia recordan aqueles tempos de loita mentres o resto das personaxes, e eles mesmos, se enfrentan aos desafíos da vida actual. «De marzo a marzo» é un diálogo constante entre o presente e o pasado, entre a comedia e o drama, entre a tenrura e a rabia. Un retrato actual das cousas que cambian co paso da historia e daquelas que parecen non mudar. Unha peza conmovedora que non deixará indiferente ao público.
SOBRE A COMPAÑÍA
Opaí Teatro nace no ano 2020 no barrio de Canido, en Ferrol. Forma parte do Canido SRD, sociedade centenaria cunha importante traxectoria no deporte e a cultura en Ferrol. A maioría dos membros do grupo veñen de formarse na Escola de teatro de Narón, e continúan formándose para seguir mellorando como intérpretes. Tamén teñen experiencia participando noutros grupos de teatro da comarca, polo que, malia ser un grupo de recente creación, as persoas que o integran teñen xa a súa bagaxe teatral.
Está dirixido por Cristina Mariño, directora, actriz e dramaturga, que leva traballando profesionalmente desde hai máis dunha década. Opaí busca facer un teatro que conecte coas inquedanzas dos tempos actuais, tomando esta arte con toda a adicación posible para traballar por un teatro amador de calidade.
