As Pontes presenta unha ampla e diversa programación cultural durante o mes de febreiro

O Concello das Pontes deseñou, para o mes de febreiro, unha programación cultural que inclúe unha ampla oferta de actividades de teatro, cinema, música, danza, obradoiros e eventos populares, dirixida a públicos de todas as idades e que se desenvolverá na Casa Dopeso, no Auditorio Municipal do Cine Alovi, na Biblioteca Municipal e nas rúas da vila.

A programación arrinca o xoves 5 de febreiro, ás 18.00 horas, na Casa Dopeso, coa actividade infantil “Mans”, de Os Contos de Pablísimo, recomendada para maiores de 3 anos, dentro do programa Xoves na Biblio.

Seguidamente, os días 7 e 8 de febreiro, ás 17.00 horas, proxectarase na Casa Dopeso a película “La leyenda de Ochi”, cunha duración de 95 minutos e cualificación NRM. Ao mesmo tempo, durante esa mesma fin de semana, poderá verse tamén a obra teatral “Hamnet” na  Casa Dopeso, con funcións en horario de tarde e noite.

Xa o mércores 12 de febreiro, ás 18.00 horas, celebrarase na Biblioteca Municipal o obradoiro creativo “Debuxando Caras”, dirixido a público infantil a partir de 5 anos, con inscrición previa, tamén dentro do programa Xoves na Biblio.

Por outra banda, o venres 13 de febreiro, ás 20.30 horas, o Auditorio Municipal do Cine Alovi acollerá o espectáculo de monólogos “DejaRme Solo”, de Sin ESE Producciones, recomendada para maiores de 16 anos. Mentres tanto, a fin de semana do 14 e 15 de febreiro estará marcada por unha intensa actividade cultural coa celebración da 45a edición da Feira do Grelo durante o sábado e o domingo.

Nesas mesmas datas, concretamente o sábado 14 e o domingo 15, proxectaranse na Casa Dopeso varias propostas cinematográficas: “Frankie y los monstruos”, ás 17.00 horas, con duración de 90 minutos e cualificación TP, e “Marty Supreme”, con sesións en horario de tarde e noite.

Ademais, a seguinte semana, o martes 17 de febreiro, ás 17.00 horas, celebrarase a tradicional Cabalgata de Entroido, que percorrerá as rúas das Pontes, converténdose nun dos eventos máis destacados e participativos do mes.

Xa no ecuador do mes, o xoves 19 de febreiro, ás 18.00 horas, a Casa Dopeso acollerá o espectáculo “3 irmáns, 3 camiños e 3 grandes perigos”, de Paula Carballeira, recomendado para maiores de 4 anos e incluído tamén no programa Xoves na Biblio.

Mentres que o venres 20, será a quenda da música coa actuación de “Madame Bird – Super F” no Auditorio Municipal Cine Alovi, a partir das 20.30 horas. Por outra parte, esa mesma fin de semana, ás 17.00 horas, poderá verse na Casa Dopeso a película “Goat, como cabras”, cunha duración de 95 minutos e pendente de cualificación.

Xa para rematar o mes, o xoves 26 de febreiro, ás 18.00 horas, o Auditorio Municipal do Cine Alovi acollerá o concerto “A Banda no Rock”, protagonizado polo alumnado do Conservatorio Profesional de Música das Pontes, dentro do programa Xoves na Biblio. Ao día seguinte, o venres 27 de febreiro, ás 20.30 horas, terá lugar no mesmo auditorio o concerto de “Merino” en formato acústico.

Finalmente, a programación pecharase o sábado 28 de febreiro co espectáculo de danza, “Monte” da compañía, Laboratorio Escénico, ás 20.00 horas, no Auditorio Municipal do Cine Alovi. Ademais, esa mesma fin de semana e ata o domingo 1 de marzo, proxectaranse na Casa Dopeso as películas “Arco” e “Cumbres borrascosas”, con sesións en horario de tarde.

Con esta programación, o Concello das Pontes reafirma o seu compromiso coa promoción da cultura como ferramenta de participación social e dinamización local, apostando por unha oferta diversa, accesible e de calidade que combina propostas profesionais consolidadas, creación contemporánea e apoio ao talento local.