Neda prepárase para disputar a IV San Silvestre

Volve un clásico da programación de Nadal de Neda. O Concello organiza este ano a cuarta edición da súa San Silvestre. A cita terá lugar o mércores 31 de decembro as 10:00 h, con saída e chegada na pista polideportiva do Roxal.

A proba, forma parte calendario oficial da Federación Galega de Atletismo, e incluída no “XI Circuíto da Deputación da Coruña”, vén de abrir o seu prazo de inscrición.

Ata o día 26 de decembro, ás 23.59 horas, todos osnatletas, federados ou non, que desexen participar deben anotarse na web www.carreirasgalegas.com, onde tamén se poderán consultar o regulamento desta carreira na que sempre é benvida a vestimenta e os complementos de Nadal. Só os maiores de idade terán que aboar a cota de inscrición de 6 euros, para os menores é de balde.

A proba absoluta terá un percorrido aproximado de 5,4 km por asfalto (tempo máximo de 45 minutos) e comezará ás 10:30 horas, unha vez finalizadas as carreiras nas categorías sub 16 e sub 14 (distancia de 1,4 km), e nas categorías sub 12 e sub 10 (700 metros). Recibirán trofeo os tres primeiros clasificados de cada categoría, masculina e feminina.

O Concello aspira a revalidar o éxito de anos anteriores, xuntando a varios centos de deportistas na contorna do río Belelle. E así, animan ás persoas afeccionadas ao atletismo de Ferrolterra, Eume e Ortegal a despedir o ano correndo. A retirada de dorsais desenvolverase, como sempre, dende as 9.15 horas na pista deportiva do Roxal.