Galicia Ártabra Digital Noticias de Ferrol y la comarca de Ferrolterra.
A Xunta de Galicia, a través da Consellería de Medio Ambiente, Territorio e Infraestruturas, volveu a abrir onte a canle de desaugamento entre a lagoa da Frouxeira e o mar, que estivo taponada nos últimos días debido ao temporal que sufriu a zona. Esta actuación evita a inundación dos inmobles próximos a este ecosistema natural.
Neste momento, a lagoa da Frouxeira desauga e estase a rebaixar a cota de inundación, mentres efectivos do departamento que dirixe Agustín Hernández seguirán na zona vixiando que o procedemento continúe con total normalidade.
O pasado mes de novembro, a Consellería de Medio Ambiente restaurou a canle histórica de comunicación entre a lagoa da Frouxeira e o mar, unha actuación preventiva coa que se pretende rebaixar o nivel da cota de inundación, evitar unha nova apertura explosiva da lagoa que a experiencia amosa como desfavorable para a conservación da lagoa e o sistema dunar, e favorecer a restauración da canle orixinaria de comunicación entre a lagoa e o mar, o que permitiría a recuperación do funcionamento hidrolóxico natural do sistema. Así, o canal aberto reproduce a condución histórica máis longa (uns 300 metros en total) e suave que a existente, e que desaugará ao norte da illa Percebelleira.
O espazo onde se está a traballar estrutúrase sobre o humidal da Lagoa da Frouxeira, incluíndo a propia lagoa en sentido estrito, a barreira litoral, a praia grande e pequena da Frouxeira, así como distintos terreos conformados por hábitats húmidos (cauces fluviais, depresións intradunares húmidas, xunqueiras, bosques húmidos) e medios dunares e de cantís contiguos a estes ). O espazo pertence á Rede Natura 2000 e está incluído dentro do ámbito territorial do Plan Director da Rede Natura 2000 de Galicia, na actualidade en fase de participación pública.
