Récord de participación na XII edición da Milla Urbana de Valdoviño

O concelleiro de Deportes, Sergio Saavedra, avanzou que na proba, que se disputa este mesmo domingo 18 de outubro, participaran máis de 200 atletas de todas as idades.

O edil valoraba moi positivamente a cifra, que duplica a da última edición. As categorías máis numerosas serán de novo a absoluta, con máis dun centenar de deportistas inscritos, e máis os biberóns, con preto de medio centenar de participantes.

A contorna do paseo da praia e lagoa da Frouxeira volverá converterse na pista privilexiada da carreira, con distancias en función da categoría, e saídas escalonadas a partir das 11:00 horas.

Pechouse a inscrición sen cota económica. Este domingo, as persoas inscritas poderán retirar o seu dorsal no punto informativo habilitado xunto á caseta de socorrismo, dende as 10:00 horas.

Recibirán medalla todos os nenos  participantes na categoría biberón, e tamén, os e as tres primeiras clasificadas do resto de categorías.