Galicia Ártabra Digital Noticias de Ferrol y la comarca de Ferrolterra.
A deputada socialista ferrolá Paloma Rodríguez rexistrará hoxe martes unha Proposición non de Lei no Congreso esixindo ao Goberno que garanta a continuidade do Parador de Ferrol dentro da rede pública e respectando a totalidade dos postos de traballo. Nesta iniciativa, que foi dada a coñecer pola propia Rodríguez nunha rolda de prensa celebrada onte na sede socialista da cidade, o PSOE tamén reclama ao Executivo do Partido Popular que aposte pola viabilidade do Parador e o seu mantemento como “referencia de calidade e excelencia no sector turístico do norte de Galicia”; que desenvolva un plan extratéxico para a innovación e modernización deste establecemento; que estruture un plan de captación e fidelización de clientela acorde coa oferta turística e cultural da zona (con especial vencellamento en rutas como a naval ou a do modernismo) e que o Parador de Turismo de Ferrol quede constituido como “eixe vertebrador das actuacións tendentes a acadar a declaración da cidade como Patrimonio da Humanidade”.
Paloma Rodríguez, que adiantou que precisamente hoxe martes e o mércores o plan de Paradores será abordado polo Pleno tanto do Congreso como do Senado, cualificou esta decisión como “ataque sistemático, directo e brutal” contra esta rede de establecementos hoteleiros públicos. No caso concreto de Ferrol, que é ao que se refire a PNL que rexistrará a deputada, a decisión de pechar o seu Parador suporía que trinta persoas irían ao paro dun xeito directo, ademais de perder outros moitos postos de traballo indirectos (proveedores, servizos, etc.).
Para Rodríguez, a rede de Paradores constitúe un “instrumento clave para a promoción dun turismo de calidade e excelencia no noso país”, ao tempo que amosou a súa convicción acerca da estratexia do PP con esta cuestión. “O Partido Popular pretende ir desmantelando pouco a pouco os Paradores co peche definitivo ou temporal dos seus establecementos, poñer en dúbida a súa viabilidade e aboar o terreo para que resulte inevitable levar a cabo un proceso de privatización destas instalacións”, asegurou a deputada, que engadiu que, fronte este xeito de facer política do PP, está o Partido Socialista, cuxo grupo parlamentario considera que Paradores é “unha marca de referencia do sector turístico español”.
“E o Parador de Ferrol axústase perfectamente a esa imaxe de modernidade e calidade” dunha cidade que aspira a ser declarada Patrimonio da Humanidade, dixo Rodríguez, que destacou que as instalacións da cidade se encadran á perfección no seu modelo arquitectónico e están moi vencelladas coa recentemente deseñada ruta da construcción naval. A este respecto, a deputada socialista acusou ao alcalde, José Manuel Rey, e ao concelleiro de Turismo –que é tamén presidente da Deputación-, Diego Calvo, de non dar unha resposta “contundente” contra esta decisión de peche e de “esquecer que están ao servizo do noso pobo e non ao do PP, que quere vender o patrimonio de todos”.
“Esta política do PP é inmoral, indecente, inxusta e inútil”, aseverou Paloma Rodríguez, para a que con esta decisión, que en ningún caso está xustificada nin ten criterio obxectivo ningún, “cercénase, unha vez máis, un polo de crecemento económico da nosa cidade”.
Rodríguez afirmou que o PSOE traballará a reo nesta cuestión para convertirse nunha “ferramenta eficaz” que acade paralizar o peche do Parador de Ferrol.
