Pontedeume homenaxea ás mulleres do mar cunha escultura conmemorativa

A obra descubrirase este sábado 19 de xullo ás 10:45 horas xunto a antiga confraría, antes da procesión do Carme.

Pontedeume descubrirá unha escultura en honra ás mulleres do mar. A obra estará situada xunto á rampla a carón da antiga confraría e, unha vez sexa presentada, comezará a procesión do Carme.

Esta actuación responde a unha proposta presentada hai dous anos por unha comisión formada por fillas e netas de peixeiras do municipio. Estas mulleres quixeron recuperar a memoria das súas nais e avoas, que “durante décadas acudían a esa mesma rampla para recoller o peixe e levalo nos ‘paxes’ para vendelo polas parroquias de Pontedeume e concellos veciños”, segundo explicou o alcalde de Pontedeume, Bernardo Fernández Piñeiro.

O alcalde destacou que coa instalación desta escultura, o Concello busca “recoñecer o esforzo, a dignidade e a contribución das mulleres do mar, figuras fundamentais na economía e na cultura local que contribuíron co seu esforzo a sacar adiante ás súas familias nunha época de grandes dificultades” e anima a toda a veciñanza a “sumarse a esta merecida homenaxe”.

Así mesmo, o rexedor anunciou que o vindeiro a ano realizarase un obra similar dedicada ás mulleres rurais “que tanta pegada deixaron nunha vila coma Pontedeume, expoñente da fermosa mestura entre mar e campo”.