Exposición «Dime, que ves?» en San Sadurniño, con obras de Cartamil e Sendón

Onte sábado quedou inaugurada na Galería do Concello de San Sadurniño a exposición «Dime, que ves?» con obras de Laura Cartamil e Maricarmen Sendón.

Unha colección de clara inspiración natural onde os estampados sobre papel e tea dialogan coas cerámicas que representan faros e cantís azoutados pola forza do vento e o mar. Para acompañar a apertura, a poeta ferrolá Amelia de Querol Orozco recitou algunhas das súas pezas.

A concelleira de Participación e Axenda 2030 do concello de San Sadurniño, Raquel Piñeiro López, destacou o rechamante da mostra plástica e, principalmente, que sexa resultado do traballo «de mulleres que tecen rede a través da cultura en toda a comarca».

A mostra poderá visitarse ata o 30 maio nos horarios de apertura das dependencias municipais, de luns a venres de 8:30 a 15:00 horas.