O Festival da Mocidade coa lingua convoca en Ferrol a máis de 700 mozos a prol da lingua galega

A concelleira de Normalización Lingüística de Ferrol, Patricia Cons, inaugurou a XXXII edición do festival da Mocidade coa lingua, que se celebrou durante a mañá deste venres 11 no auditorio de Ferrol. “O Concello de Ferrol colabora, ano tras ano, neste festival, apoiando o xeneroso traballo que desenvolve o profesorado que constitúe a Coordinadora de Equipas de Ferrolterra”, manifestou a concelleira. Esta entidade está integrada por diversos centros de ensino de Ferrol e da comarca, e dende hai máis de 30 anos traballa a prol da lingua galega.

O seu traballo, coa colaboración do Concello de Ferrol, permite que hoxe actúe, no auditorio, alumnado de diferentes centros de ensino: CPI Atios, IES Concepción Arenal, IES de Fene, IES Sofía Casanova, IES Fernando Esquío, CMUS Ferrol, CPR Tirso de Molina e IES Carvalho Calero. Para participar os alumnos deben crear cancións con letra e música orixinal, un traballo que realizaron hai meses nos diferentes centros de ensino.

“Vós, mozos, sodes o futuro do noso idioma, un idioma milenario que nos diferenza neste mundo, cada vez máis globalizado”, afirmou a concelleira que animou aos mozos a seguir participando nos festivais da mocidade coa lingua.