Aberto o prazo en Narón para reservar praza na sesión multidisciplinar “Coñecendo a Andersen”

A concelleira de Bibliotecas de Narón Olga Ameneiro, anunciou a apertura do prazo, na tarde desde martes 1 ás 16:00 horas, para reservar praza para participar na actividade Coñecendo a Andersen. Trátase da primeira proposta da programación deseñada dende o Consistorio para conmemorar o Día Internacional do libro infantil e xuvenil e que permitirá aos asistentes achegarse á figura de Hans Christian Andersen.

A edil naronesa indicou que a actividade se desenvolverá este sábado día 5 ás 11:00 horas na Biblioteca. O 2 de abril celébrase o Día Internacional do libro infantil e xuvenil, unha data na que se conmemora o nacemento de Andersen, mestre dos contos de fadas e autor, entre outras, de historias como O parruliño feo, A sereíña…

A actividade está pensada para menores a partir de 4 anos, que poderán participar nunha sesión multidisciplinar que incluirá unha introdución sobre o significado desta conmemoración, un achegamento á figura de Hans Christian Andersen e o seu legado literario e un obradoiro creativo no que os menores poderán dar renda solta á súa imaxinación inspirándose nos seus contos.

Para poder inscribirse hai que facelo de xeito presencial na Biblioteca, no mostrador da sala de adultos ou chamando por teléfono ao número 981 382 173.