Arranca a X Edición do Galicia Fórum Gastronómico

A Cofradía de Pescadores de Ferrol participa neste evento cun stand no que se ofrecerá unha degustación de ameixas e un showcooking de vieiras da ría ferrolá.

A Deputación da Coruña amosa ‘A paisaxe que sabe’ no Galicia Fórum Gastronómico, a feira que celebra a súa décima edición en EXPOCoruña deste domingo 23 ao martes 25 de marzo. Farao coa colaboración dunha decena de produtores da provincia e ofrecendo un amplo programa de case 30 iniciativas no seu stand.

Con ‘A Paisaxe que sabe’, a súa nova campaña, a Deputación da Coruña  pon o foco nos elementos paisaxísticos que alimentan a gastronomía da provincia e reforza a estratexia de compromiso cun turismo de calidade, que promova a preservación do medio e a mellora socioeconómica da contorna.

A Despensa D’Lujo (Coristanco), Cafés Lúa (Carballo), Chichalovers (Santiago de Compostela), Galmesán (Arzúa), Martietas de Fío (Bergondo), Orixes Galegas (Boqueixón), San Isidro Bakery (Bergondo), Sotavento (Outes) e Vánagandr (Cambre) son os produtores locais que, nesta ocasión, van da man da Deputación. Xunto a elas, a institución provincial ofrecerá durante os tres días do evento no seu stand un programa con almorzos, showcookings e degustacións desde as 11:00 horas ata máis aló das 18:30 horas.

Para estas actividades, a Deputación tamén contará con presentacións dos centros colaborativos da Fusquenlla (Moeche) ou Brión e cociñeiros e cociñeiras como Nel Parada (Nodestada, en Portosín), Víctor Basante (Arrueiro, en Laxe), Iria Espinosa (Árbore da Veira, A Coruña), Miguel Vázquez (Atípico, A Coruña), Nair González (Muelle 43, Mugardos) ou Lucía Freitas (A Tafona, Santiago).

A Cofradía de Pescadores de Ferrol participa neste evento cun stand no que se ofrecerá unha degustación de ameixas e un showcooking de vieiras da ría ferrolá.

A Confraría de Pescadores de Ferrol participa tamén neste evento e na primeira xornada, realizará unha degustación gratuita de tres variedades de bivalvos da ría de Ferrol: ameixa babosa, ameixa rubia e ameixa xapónica. Será o domingo en horario de 12.00 a 14.00 horas, no stand nº 153 do Fórum Gastronómico.

Ó día seguinte, a promoción de produtos da ría de Ferrol continuará con un showcooking a cargo de Dani López, do restaurante O Camiño do Inglés, galardonado con dous Soles Repsol. O chef realizará diferentes receitas tomando como materia prima a vieira da ría de Ferrol, o luns ás 13.00 horas.

O Fórum Gastronómico rematará o martes 25, xornada que se aproveitará para promocionar entre os visitantes os peixes e mariscos que captura e comercializa a Confraría de Pescadores e Mariscadores de Ferrol.

O Galicia Fórum Gastronómico, enfocado principalmente a profesionais da enogastronomía, acada a súa décima edición e neste 2025 terá como eixo principal ‘Un océano de cocinas’ para facer honra á diversidade culinaria que emana das profundidades do Atlántico.