Galicia Ártabra Digital Noticias de Ferrol y la comarca de Ferrolterra.
O Pazo da Cultura de Narón acolleu este mércores 19 a primeira edición das Olimpíadas Galegas Escolares de Seguridade Viaria organizadas polo Concello. O alumnado de quinto curso de Primaria do colexio naronés Ayala repetiu trunfo e alzouse co primeiro premio, se ben o segundo e o terceiro obtivérono os escolares do CPR Plurilingüe Sagrado Corazón-Mercedarias, de Ferrol, e o FEC Plurilingüe San José, de Lugo, respectivamente.
O concelleiro de Seguridade Cidadá, José Oreona, deu a benvida aos asistentes á convocatoria, á que ademais da alcaldesa, Marián Ferreiro, e outros integrantes da corporación local, entre eles a edil de Ensino, Olga Ameneiro, participaron a xefa provincial de Tráfico da Coruña, María Victoria Gómez; o tenente xefe do destacamento de Tráfico da Garda Civil, Francisco Javier López, e o axente da policía local de Pamplona Pablo Berastegui.
As olimpíadas reuniron no Pazo a escolares de oito centros de ensino, entre eles representando á cidade os do colexio Ayala de Narón, que onte obtiveron o primeiro premio nas VI Olimpíadas escolares de seguridade viaria celebradas tamén nas citadas instalacións municipais. Os estudantes naroneses competiron cos do CEIP Wenceslao Fernández Flórez, da Coruña; do CPR Plurilingüe Sagrado Corazón-Mercedarias, de Ferrol; do FEC Plurilingüe San José, de Lugo; do CPR Plurilingüe María Auxiliadora Salesianos, de Ourense; do SEK International School Atlántico, de Pontevedra; da Escola Rosalía de Castro, de Vigo e da Casa do Neno, de Santiago de Compostela.
Algúns dos participantes foron entrevistados ao longo do día por estudantes do CEIP Ponte de Xuvia, que realizaron un programa para Radio Ponte, a emisora do centro. O edil de Seguridade Cidadá abriu a convocatoria, presentada pola naronesa Icía Izquierdo, estudante do IES As Telleiras, e destacou o traballo realizado para poder desenvolver na cidade estas olimpíadas, nas que desexou sorte a todas e todos os participantes. A continuación, comezou a proba do Kahoot, con 35 preguntas tipo test que contestaron os representantes de cada centro.
Tras un breve descanso para repoñer forzas, comezou a segunda proba, a audiovisual, na que realizaron unha campaña sobre “Mobilidade escolar e educación viaria” que se presentou publicamente. A presentación dunha maqueta sobre “Como mellorarías o teu entorno escolar en relación coa mobilidade e a educación viaria?” foi outra das probas realizadas. O xurado, integrado por José Antonio Carballido, oficial da policía local de Narón; Victoria Gómez, xefa provincial de Tráfico da Coruña; Francisco Javier Dopico, xefe do destacamento de Tráfico; Marta Román, experta na infancia en espazo urbano; Patricia Rodríguez, representante das Anpas e Laura Fernández, do equipo Laura, valorou os traballos presentados.
Os escolares tamén participaron na proba “Descubre a palabra oculta”, na que a través dunhas pistas -catro- tiñan que adiviñar unha palabra relacionada coas materias abordadas, tarefa para a que contaron cunha tablet para buscar en internet.
Os encargados de amenizar a convocatoria foron Lúa Díaz e Zaida Rodríguez, do Club Baile Deportivo Narón, que subiron ao escenario para deleitar ao público cos seus bailes.
Finalmente, a alcaldesa, Marián Ferreiro, entregou os premios -mochila, diplomas e medallas, máis unha placa conmemorativa aos gañadores- xunto con outros representantes do goberno local e os integrantes do xurado. A alcaldesa da cidade foi a encargada de pechar o acto, felicitando aos participantes, en especial aos gañadores, e tamén ao resto de persoas que fixeron posible a celebración destas olimpíadas. “Máis de dúas décadas de traballo, preto de 70.000 escolares de infantil, primaria, secundaria e bacharelato, dez centros de ensino, persoal directivo e docente, Anpas, familias… isto é un resumo do que foi e o que é a educación viaria na nosa cidade”, destacou.
A rexedora local destacou tamén o papel da DXT, Mapfre, autoescolas, SPEIS, Policía Local, Protección Civil…”todos deron coa fórmula que nos permitiu en boa medida chegar ata aquí co equipo de educación viaria”. A rexedora local destacou a aposta do Concello por esta área e reafirmou o compromiso de continuar traballando nesta liña en colaboración con todas as persoas e entidades implicadas.
