Cedeira aproba a tramitación de subvencións de programas de diferentes institucións

O Goberno local de Cedeira aprobou a tramitación de diferentes axudas, ao abeiro de convocatorias de diferentes organismos da adminstración autonómica, para levar adiante investimentos e contratacións de persoal. En total, os proxectos que se van acoller a estes programas, tanto de adquisición de equipamento como de realización de obras e contratación de servizos, suman un orzamento de máis de 250.000€.

Unha desas axudas é a do Plan Camiña Rural, unha convocatoria da Consellería de Medio Rural que ten por obxectivo a mellora dos accesos a parcelas agrícolas. O Concello de Cedeira vai presentar a este programa un proxecto para a mellora da capa de rodadura en diferentes pistas de titularidade municipal, cun orzamento de 83.310,73€ (IVE incluído). A contía das axudas parte dun fixo para cada munipio que se incrementa despois en función das súas características, entre outras cousas o número de entidades de poboación.

Tamén vai solicitar o Concello, un ano máis, as subvencións do Fondo de CompensaciónAmbiental, que lle corresponden por ter no seu territorio aeroxeneradores e líneas de evacuación da súa produción de enerxía. Neste caso, a administración local vai poder financiar parte da compra dun vehículo, valorado en 125.913,81€, destinado a actuacións de protección do medio ambiente e do espazo natural, e tamén a contratación de dous peóns e un técnico de medio ambiente, todos con xornada completa e durante tres meses. O custo destas contratacións de persoal é de 20.558,22€.

Na mesma sesión a Xunta de Goberno deu luz verde á solicitude de axudas da Consellería de Presidencia para a contratación dunha empresa que prestará o servizo de socorrismo durante o próximo verán. A previsión é contar con tres socorristas durante tres meses, do 15 de xullo ao 15 de setembro, cuxos custos ascenden a 18.119,75€. A subvención solicitada chega a 16.307,78€.

Por último, o goberno local aprobou darlle curso ao proxecto presentado por Viaqua, a empresa adxudicataria do servizo de abastecemento, para concurrir a unhas axudas de Augas de Galicia e realizar unha auditoría dirixida a coñecer o estado da rede e minimizar as perdas. O orzamento é de 8.442,99€ e a subvención cubriría o 80%.