Galicia Ártabra Digital Noticias de Ferrol y la comarca de Ferrolterra.
Os socialistas instan ao Goberno local «a que deixe de malgastar os cartos da cidadanía ferrolá contratando traballos que xa están feitos polo funcionariado»
O grupo socialista de Ferrol denuncia «a contratación a unha empresa privada o pasado 18 de febreiro por parte do Goberno de Rey Varela por un importe de 3.509 € un traballo que xa está feito, o que foi cualificado como “inaudito”. “Non sei se non se enteran ou é que non saben onde invertir os cartos dos ferroláns ou tal vez ambas cousas á vez”, sinalou o concelleiro socialista Germán Costoya.
Como explicou o edil, «dende o primeiro día que chegou Rey Varela, o goberno local dispoñía dun prego de condicións técnicas para a contratación do servizo de conservación e reposición da sinalización da cidade, así como de bolardos e espellos, elaborado pola Policía Local de Ferrol. Malia contar co traballo realizado, e malia o “desastroso” estado no que se atopa a cidade neste sentido, o Goberno do PP “non fixo absolutamente nada en case dous anos e agora contratan a redacción dun prego que xa tiñan dende o principio”. “Parecería un chiste se non fora porque ademais supón pagarlle máis de 3.500 € a unha empresa para que faga un traballo que xa tiñan feito cando chegaron ao Goberno”, afirmou o concelleiro socialista.
O concelleiro subliñou que «a Policía Local é a que mellor sabe todas as necesidades que ten a cidade en canto á seguridade viaria, e por iso no anterior mandato socialista se lles encargou a eles que fixeran o prego para poder contratar todos os traballos que foran precisos. “Pero ao Goberno de Rey Varela non lle chega con ter abandoado Ferrol con pasos de peóns e prazas de mobilidade reducida que case non se ven, sinais de tráfico e bolardos tortos, ausentes ou tirados polas beirarrúas durante estos casi dous anos de mandato, senón que ademáis despreza o traballo feito pola Policía Local contratando a unha empresa privada un Prego que xa se fixo, é inaceptable”, dixo Costoya.
Para o edil do PSdeG-PSOE, “xa está ben de facer política de escaparate, onde o único que lle importa ao Goberno de Rey Varela é realizar pomposos anuncios do que din que van a facer e sacarse fotos ‘facendo como que fan’ pero sen facer nada, e mentres a cidade está totalmente abandoada de traballos básicos como é, neste caso, a seguridade viaria”, apuntou Germán Costoya, que engadiu que “falan de tirar grandes muros mentres a realidade é que son incapaces mesmo de pintar un pequeno paso de peóns ou de repoñer unha sinal de tráfico, un bolardo ou un espello”.
