O Museo do Humor Xaquín Marín en Fene e Demo Editorial, empresa de referencia na edición de banda deseñada e novela gráfica en galego, volven unir as súas forzas para “achegar os escolares galegos ao mundo da banda deseñada, fomentando a súa creatividade dende unha perspectiva humorística”.
Baixo esta previsa, ámbalas dúas entidades convocan o III concurso de banda deseñada de humor Demo pequeno. O certame, para o que xa está aberto o prazo de presentación de obras, vai dirixido a mozos galegos de 8 a 16 anos, que poderán participar de xeito individual ou por equipos de dúas persoas (guionista e debuxante) nas seguintes categorías: Infantil, para rapazada de 8 a 11 anos, ou Xuvenil, para mozos e mozas de 12 a 16 anos. Valorarase “a composición do debuxo e o uso de diferentes técnicas pictóricas pero tamén a propia historia e o sentido humorístico da mesma”. O prazo de presentación de orixinais finalizará na medianoite do domingo 18 de maio de 2025.
Os autores participantes deberán presentar unha única historia curta de banda deseñada (máximo 1 páxina) ou tira cómica, con enfoque humorísitico e temática: “As bibliotecas como espazos fundamentais para a educación, a cultura, a inclusión, a información… nos que, ás veces, acontecen escenas hilarantes, que provocan risa”. Todo isto desde a perspectiva do humor e da crítica».
A obra, que deberá ser inédita e orixinal, presentarase en papel ou cartolina en tamaño 297×210 mm (DIN-A4) ou 297×420 mm (DIN-A3). Todos os textos que se inclúan na bd ou tira cómica deberán estar redactados en galego aínda que tamén se poderán presentar traballos sen texto.
A obra poderá enviarse por correo postal a: “Museo do Humor Xaquín Marín. Avda. Conces, 20-22, 15500 Fene, A Coruña”. Acompañando á mesma, adxuntarase nun sobre pechado ou plica toda a información sobre o autor ou autora (datos especificados nas bases). Tamén se poderá enviar a obra escaneada por correo electrónico, en formato PDF, ao enderezo seguinte: museodohumor@gmail.com. Neste caso, na mensaxe incluiranse dous arquivos: un titulado “obra” e outro, “plica”.
En canto aos premios, establécense os seguintes:
Categoría Infantil (de 8 a 11 anos)
1º Premio, dotado con 100 € en metálico, un lote de libros de banda deseñada de Demo Editorial, material de debuxo por valor de 75€ e diploma.
2º Premio, dotado cun lote de libros de banda deseñada de Demo Editorial, material de debuxo por valor de 50€ e diploma.
Categoría Xuvenil (de 12 a 16 anos)
1º Premio, dotado con 150 € en metálico, un lote de libros de banda deseñada de Demo Editorial, material de debuxo por valor de 100€ e diploma
2º Premio, dotado cun lote de libros de banda deseñada de Demo Editorial, material de debuxo por valor de 75 € e diploma.
O xurado estará formado por Xulia Pisón Egea e Álvaro López Santos, autores de recoñecida traxectoria no ámbito da banda deseñada infantil e xuvenil; polo editor de Demo Editorial, Manel Craneo e pola responsable do Museo do Humor Xaquín Marín, Almudena Marcos.
O fallo do xurado darase a coñecer o venres 20 de xuño a través da páxina web e/ou redes sociais de Demo Editorial, do Museo do Humor Xaquín Marín e dos medios de comunicación.
A entrega do premio terá lugar no prazo máximo dun mes desde a data de publicación do fallo do xurado, nas instalacións do Museo do Humor Xaquín Marín de Fene. E, segundo se establece nas bases, os traballos gañadores e finalistas (no caso de habelos), xunto cunha selección dos debuxos presentados ao concurso figurarán na exposición que organizará o Museo do Humor Xaquín Marín ao longo do 2025 (datas pendentes de concretar).
Bases completas da convocatoria na web do Concello de Fene, Museo do Humor Xaquín Marín e Demo Editorial. Para consultar calquera cuestión sobre o concurso ou resolver dúbidas, pódese chamar ao 981 342 400 (de luns a vernes en horario de mañá) ou enviar un correo electrónico a museodohumor@gmail.com
Galicia Ártabra Digital Noticias de Ferrol y la comarca de Ferrolterra.
