Galicia Ártabra Digital Noticias de Ferrol y la comarca de Ferrolterra.
A Agrupación Instrutiva de Caamouco vivirá por todo o alto o Entroido 2025. A Sociedade deseñou unha completa programación, na que a gastronomía e a troula para todas as idades son as protagonistas.
A primeira das xornadas terá lugar este sábado 22 de febreiro. A partir das 14:30 horas a Agrupación ofrecerá un xantar de Entroido, cun completo menú típico destas datas, composto por sopa, cocido completo con grelos, pan, viño de Barrantes, torrijas, café e chupito. O número máximo de comensais é de 60, por orde de inscrición a través do teléfono 616 74 02 05.
O prazo para o público xeral xa está aberto. O prezo para socios é de 27 euros e para non socios de 30 euros. Para a rapazada (ata 12 anos) o menú infantil terá un prezo de 12 euros.
A partir das 17:00 horas, a música e a troula serán as protagonistas, con propostas abertas a todo o mundo. Primeiro coa actuación da comparsa fenesa Santa Compaña, en colaboración con Radiofusión. O grupo ofrecerá unha escolma de cancións con letras ateigadas de humor e retranca. A continuación, contra as 18:00 horas, arrancará o baile de entroido amenizado por DJ Luiso.
Ao día seguinte, o domingo 23, a festa continúa co baile de disfraces infantil. Será a partir das 17:00 horas. Haberá unha chocolatada de balde para todos os asistentes e da man dos animadores de La Guagua, a Agrupación ofrecerá aos nenos unha completa festa con xogos, música e un obradoiro de pintacaras.
