Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista de Ferrol quere trasladar a súa preocupación pola situación que atravesa a piscina municipal de Caranza «que leva máis dun mes sen auga quente debido a unha avaría na caldeira. Esta situación está a xerar incomodidades entre os usuarios, que se ven obrigados a ducharse con auga fría ou a non facelo, afectando á súa experiencia nas instalacións».
«Entendemos que as avarías poden ocorrer en calquera infraestrutura, pero consideramos que o tempo transcorrido sen resolver este problema está a ser excesivo. A falta de solución tamén está a prexudicar gravemente aos clubs deportivos que empregan a piscina, tanto nos seus adestramentos como nas competicións que organizan ou nas que participan, dificultando o normal desenvolvemento destas actividades. Ademais, repercute en todos os usuarios, que ven limitada a súa capacidade para facer uso das instalacións en condicións axeitadas».
Por iso, desde o Grupo Socialista solicitamos ao goberno municipal «que priorice a reparación da caldeira, de xeito que o servizo volva funcionar en condicións óptimas canto antes».
«Ademais, cremos que sería conveniente reforzar os labores de mantemento preventivo neste tipo de instalacións, fundamentais para a práctica deportiva e o benestar da cidadanía, para evitar que este tipo de situacións se repitan no futuro».
Desde o Grupo Socialista «reafirmamos o noso compromiso coa mellora dos servizos públicos e ofrecemos a nosa colaboración ao goberno municipal para que, entre todos, logremos garantir que instalacións como a piscina de Caranza estean sempre nas mellores condicións posibles para os veciños».
