Pontedeume recibe subvención do goberno central para rehabilitar o Torreón de Andrade

O Concello de Pontedeume recibirá unha subvención de 273.386,75€ do Goberno estatal para a restauración da cuberta e a rehabilitación integral do Torreón dos Andrade.

Esta contía representa o 75% do custo total da obra, de 364.515,67 euros. Os 91.128,92 euros restantes serán aportados polo propio Concello de Pontedeume.

Trátase dunha axuda impulsada polo Ministerio de Transportes e Mobilidade Sostible e o Ministerio de Vivenda e Axenda Urbana para a conservación ou enriquecemento do patrimonio histórico español. Encádrase no Programa 2% Cultural.

Na resolución provisional da axuda, o Torreón dos Andrade de Pontedeume é un dos catro monumentos que recibirán a axuda en Galicia. Completan a lista a torre do reloxo da Catedral de Santiago de Compostela, o arquivo da Catedral de Tui e o xardín botánico de Caldas de Reis.

O alcalde de Pontedeume, Bernardo Fernández Piñeiro, agradece ao Goberno de España «o seu compromiso con Pontedeume e con Galicia, que se demostra unha vez máis con esta axuda para preservar o noso patrimonio». Pola súa banda, a concelleira de Turismo e Promoción Económica, Ángela Piñeiro Carrera, destaca que «esta actuación permitirá garantir que o Torreón dos Andrade, un dos nosos bens culturais máis prezados e recoñecido no conxunto do Estado, siga a estar en perfectas condicións de conservación»