Narón conmemora o 25N con actividades varias

A alcaldesa, Marián Ferreiro, e a edil de Igualdade, María Lorenzo, presentaron a programación do Día Internacional para a eliminación da violencia contra as mulleres.

A alcaldesa da cidade, Marián Ferreiro, e a concelleira de Igualdade, María Lorenzo, presentaron os actos cos que o Concello conmemorará este mes o 25N, Día Internacional para a eliminación da violencia contra as mulleres. A programación a desenvolver dará comezo, tal e como avanzou a edil, este luns 18 xornada na que se abrirá na Biblioteca do Alto a mostra bibliográfica “Mulleres contra a violencia de xénero”.

Dende ese día ata o 30 deste mes poderanse ver nas citadas instalacións, dentro do horario de apertura habitual, diverso material relacionado con esta temática. O Concello organizou ademais unha nova edición do obradoiro de defensa persoal para as mulleres, que terá lugar os días 22 e 30 deste mes, de 17.00 a 20.00 e de 10.00 a 13.00 horas respectivamente, no Centro Comunitario Manuela Pérez Sequeiros.

Este obradoiro diríxese a mulleres e nenas a partir de 12 anos empadroadas en Narón e o prazo de inscrición rematará o vindeiro luns. Poden realizarse, de balde, chamando ao número de teléfono 633 497 990 en horario de 8.00 a 14.00. Este mesmo obradoiro realizouse en centros de ensino da cidade, de terceiro curso da ESO dos colexios Santiago Apóstol, Jorge Juan, Ayala, IES As Telleiras e CPI do Feal.

Finalmente, na xornada do propio 25N haberá un flashmob pola Igualdade, aberto á participación da cidadanía en xeral. Trátase dunha coreografía reivindicativa e colectiva que se levará a cabo na praza da Igualdade, na Gándara, ás 17.00 horas, baixo o nome de Flashmob Raíñas.

As persoas que desexen participar poderán inscribirse ata o día 25 ás 12.00 horas a través do enlace: https://tinyurl.com/mpkdzvzb.

As persoas inscritas recibirán un enlace a través do que poderán descargar un vídeo didáctico co que ensaiar previamente os pasos, sinxelos e asequibles. A coreografía rematará cunha consigna en lingua de signos, tamén incluída no enlace.

Dende o Concello recomendase chegar á praza da Igualdade ás 16.30 horas para poder ensaiar previamente e tamén levar roupa cómoda sendo unha das prendas exteriores de cor violeta. Unha vez rematado o flashmob dará comezo o acto institucional do 25N no que poderán participar todas as persoas que o desexen.

A alcaldesa, Marián Ferreiro, animou ás veciñas e veciñas a participar nestes actos “co fin de sumar forzas e reivindicar a necesidade do fin de calquera manifestación de violencia contra as mulleres e construír entre todas e todos un mundo máis igualitario”.

Lea también

Club Arco Narón inicia las clases al aire libre

Como viene siendo habitual, el mes de abril indica el comienzo de las clases de …