Galicia Ártabra Digital Noticias de Ferrol y la comarca de Ferrolterra.
A Concellaría de Cultura vén de presentar parte da programación para celebrar a efeméride, incluíndo diferentes xogos de buscapistas na biblioteca municipal de Ares. Será necesario inscribirse precisarán previamente a partir deste 30 de outubro ás 16:00 h. vía telemática na web do Concello. Haberá outras dúas actividades complementarias nas instalacións da Alianza Aresana: unha mesa con libros de temática do Samaín e un photocall terrorífico para a veciñanza que se pase por alí.
O Concello presentou algunhas das actividades que se organizarán polo Samaín 2024, onde a Biblioteca Municipal de Ares se converterá nun escenario terrorífico grazas ás propostas que se achegan dende a área de Cultura.
‘Unha biblioteca de medo’ é o nome que recibe a busca de pistas que se promoverá a vindeira semana en tres quendas distintas. Trátase dunha aproximación dos pequenos á biblioteca procurando atopar obxectos, notas e outros elementos desperdigados polas diferentes áreas ou mesmo polos libros, facendo que a rapazada chegue ben preparada para a aventura coas súas lanternas e mesmo caracterizados para a ocasión.
A área de Cultura estableceu tres grupos con 25 prazas cada un, repartíndose do seguinte modo:
– Grupo 1: nenos/as de 3 a 5 anos. Martes, 5 de novembro ás 19:30 horas
– Grupo 2: nenos/as de 6 a 10 anos. Mércores, 6 de novembro ás 19:30 horas
– Grupo 3: nenos/as de 11 a 14 anos. Xoves, 7 de novembro ás 19:30 horas
Esta proposta precisará de reserva previa a través dun formulario telemático habilitado na web institucional, www.concellodeares.gal dende este 30 de outubro de 2024, e terá un custe de 3 euros que se abonará despois da confirmación da praza.
Os membros de familia numerosa contarán cun 50 % de desconto.
De igual xeito, tamén dende o citado mércores se porá a disposición da veciñanza usuaria da biblioteca tanto un Photocall Terrorífico para sacar fotografías do Samaín ata o 11 de novembro como unha escolma tematizada con historias cargadas de ambientes opresivos para que ninguén quede sen pasar a súa dose de medo.
