Narón súmase á limpeza simultánea de ríos en Galicia

O concelleiro de Medio Ambiente, Manuel Ramos, e Borja Díaz, técnico en Educación e control ambiental, anunciaron este luns 23 a participación do Concello de Narón na “XVII Limpeza simultánea de ríos en toda a xeografía galega”, organizada pola citada asociación ecoloxista e Proxecto Ríos, cos que colabora Díaz.

A convocatoria desenvolverase este domingo, día 29, entre as 10:30 e as 14:00 horas, e conta coa participación de preto de 60 municipios e 70 entidades galegas, tal e como apuntaron. A finalidade deste acto é limpar de lixo os ríos a través da colaboración do voluntariado, polo que poderá participar calquera persoa que o desexe.

No caso de Narón a tarefa realizarase, segundo as previsións iniciais, na marxe do río entre a rotonda de Freixeiro e o muíño das Aceas. O Concello aportará material e servizos para poder levar a cabo esta convocatoria. A iniciativa está aberta á participación das persoas que desexen colaborar, que poderán facelo pola senda peonil e ciclista ou con calzado apropiado –botas de auga- pola propia beira do río Freixeiro.

Os nenos menores de idade deberán ir acompañados do pai/nai ou titor. Para anotarse haberá que chamar ao número de teléfono 627 396 653, ata o xoves ás 20:00 horas, con fin de ter unha previsión sobre o material preciso.

O proxecto ríos é un programa de educación e voluntariado ambiental encamiñado a dar a coñecer o importante papel dos cursos fluviais, amosar as súas problemáticas e fomentar iniciativas que permitan á cidadanía o mantemento e a mellora dos ríos proporcionando ferramentas que garantan a súa participación, tal e como indican dende Adega.

O edil naronés animou ós veciños a participar nesta convocatoria, “unha acción máis de sensibilización ambiental na que colaboramos dende o Concello, co fin de tratar de concienciar á xente da importancia de manter limpos os nosos ríos en particular e as nosas cidades en xeral”.