Galicia Ártabra Digital Noticias de Ferrol y la comarca de Ferrolterra.
O Concello de Cedeira publicou o expediente de licitación das obras de “Creación de espazos verdes na rúa Silva 26”, unha actuación que ten un orzamento de 67.555,12€ (IVE incluído) e que se vai financiar en parte cos recursos do POS+2024.
A intervención vai dirixida a humanizar este espazo, situado nunha bifurcación da zona coñecida como a das “Casas Baratas”, con mobiliario urbano e vexetación para convertilo nun lugar acaído para o encontro e a convivencia da veciñanza.
Son 73 metros cadrados situados na bifurcación da rúa Silva, á altura do número 26, que actualmente están degradados e desaproveitados. As obras abranguen a plantación de árbores e a instalación dunha zona de bancos cunha estrutura cuberta parcialmente que fará máis confortable este espazo.
Haberá tamén un aparcamento de bicicletas e renovaranse as beirarrúas ao arredor, que agora non son moito máis que un bordo, dándolles un ancho suficiente para garantir a accesibilidade.
A nova zona verde da rúa Silva está situada contra a fachada cega dun edificio, na que o Concello se propón, sempre que conte co consenso dos veciños do inmoble, unha nova obra de street art.
As empresas interesadas en concurrir ao proceso de licitación teñen ata o día 3 de outubro para presentar as súas ofertas. O expediente está publicado na Plataforma de Contratación do Sector Público e seguirá o procedemento aberto simplificado. O Concello de Cedeira aportará 32.003€ do presuposto e a Deputación da Coruña, a través do POS+2024, os restantes 35.551€.
