O BNG de Mugardos valora positivamente o encontro dos grupos da oposición

Despois da reunión mantida durante o día de onte, luns  17,  entre o Bloque Nacionalista Galego, EU e PSdeG-PSOE, Evaristo Deus, cabeza de lista do BNG de Mugardos, vén de facer este martes a súa valoración do encontro convocado pola dormación nacionalista..

Xuntanza miu satisfactoria

“As tres forzas consensuamos que o actual goberno traballa sen un plan nin estratexia a futuro, sen proxecto de vila nin propostas a medio-longo prazo”, expón Deus, que definiu a xuntanza como “moi satisfactoria” para a formación que lidera.

“Desenvolveuse nun clima de diálogo constructivo, o que permitiu acadar consensos na análise xeral: o goberno actual, despois deste ano de mandato, é incapaz de atender á veciñanza, solventar as necesidades fiscais do Concello, manter instalacións deportivas e infraestruturas ou encargarse de servizos básicos como a recollida de lixo e a limpieza de todo o termo municipal; síntomas, en esencia, dunha desidia en todos os aspectos, dende os económicos aos máis cotiáns”, continúan dende o BNG.

 Un método de traballo conxunto a toda a oposición

“Recíbese positivamente por parte do resto de interlocutores a nosa idea de consolidar unha liña de actuación política transversal a toda a oposición, co foco en realizar unha avaliación continua, compartida entre as tres forzas de esquerdas, da acción do goberno. E esta oposición en bloque sería chave para garantir algo fundamental: a reducción do deterioro do concello o máximo posible”, fai fincapé Evaristo Deus.

“Como primeira forza de esquerdas da vila”, continúan dende o BNG, “adoptamos a responsabilidade de iniciar e liderar este proceso de diálogo do que verdadeiramente agardamos que saia unha oposición unificada”.

Despois da xuntanza deste luns, o BNG de Mugardos ten “o compromiso do PSdeG-PSOE, un paso fundamental para avanzar neste deseño conxunto da oposición, e esperamos que EU, que evitou dar unha postura en firme, tamén se sume e se comprometa a construír colectivamente esta alternativa que aglutine forzas e loite pola reactivación do concello”.

E conclúe Evaristo Deus: “É imperativo que haxa un entendemento entre as tres organizacións para traballar colectivamente polo noso municipio. Apelamos ao resto de forzas da oposición á responsabilidade, sabendo que dende o BNG, seguiremos dando os pasos que sexan necesarios para a mellora de Mugardos e o establecemento dunha oposición conxunta e unificada”.