Galicia Ártabra Digital Noticias de Ferrol y la comarca de Ferrolterra.
O Concello de Fene abriu esta semana a súa Oficina de Información e Turismo (OIT), situada no número 52 da Avenida Naturais. Contará cun servizo de atención ao público de luns a venres, en horario de 8.30 a 15.30h, que rematará o 9 de outubro.
Desde esta Oficina de Turismo atenderase ás visitantes de Fene, achegando información sobre os recursos, servizos e actividades do propio concello, así como do Xeodestino e da provincia da Coruña. Ademais, ao situarse ao pé do Camiño Inglés, será punto de referencia para as persoas que se achegan facendo o Camiño de Santiago e grupos de peregrinos.
“As previsións apuntas a que superaremos as cifras de visitantes de anos anteriores, chamados por reclamos como o Premio ao Mellor Mural do Mundo -coa violonchelista de SFHIR- ou a axenda cultural arredor do Mes da Patria ou os festivais Perla Mural Fest, Felicia Pop e Fene Rock” apuntou a concelleira de promoción económica a turismo, Ángeles Coira.
Este servizo de atención a visitantes de Fene está cofinanciado pola área de turismo da Deputación da Coruña
Participación en feiras
Seguindo co traballo posto en marcha pola área de promoción económica e turismo que dirixe Coira, o Concello de Fene participará activamente en diversas feiras e actos promocionais en próximas datas.
O 22 de xuño estará presente nunha nova edición do “Primavera no Camiño”, que se celebrará na Coruña, un evento no que Fene porá en valor os seus recursos patrimoniais, paisaxísticos, artísticos e gastronómicos vencellados ao paso do Camiño Inglés pola localidade.
Ademais, entre o 1 e o 4 de agosto, contará cun stand no espazo turístico de Equiocio 2024, no que se darán a coñecer os principais reclamos turísticos de Fene, as súas tradición, festas e citas de interese entre as persoas que se acheguen a este evento hípico internacional.
