Galicia Ártabra Digital Noticias de Ferrol y la comarca de Ferrolterra.
Ferrol en Común ven de presentar máis de 10 achegas ao Plan Estratéxico de Cultura, «un documento que, primeiramente ten que se actualizar con novos datos socioeconómicos e un novo cronograma de actuacións, xa que quedou desfasado no tempo».
FeC expón que «xa no seu día, amosamos unha actitude positiva ante a recepción de dito Plan e valoramos este documento coma unha estratexia cultural importante de cara ao futuro da cidade, sen embargo, consideramos que o Plan debe estar totalmente consensuado co sector cultural e con todos os grupos políticos, xa que a súa vixencia estenderase máis dun mandato».
«Entre as nosas achegas atópanse cuestións que non contempla o Plan e que para nós deberían de estar incluídas sen dúbida ningunha coma por exemplo, os locais de ensaio, uns espazos que veñen funcionando con éxito dende hai anos e contribúen a dar apoio aos artistas locais; a creación dunha biblioteca infantil para nenos de 0 a 11 anos, diferenciando bebeteca e infantil; o desenvolvemento dun Regulamento de Usos para todos os espazos municipais da area de cultura; inclusión da Banda Municipal de Música no Plan facendo unha clara aposta pola súa consolidación; a recuperación do taller de gravado ou o Premio Internacional de Piano, dúas cuestións que non aparecen reflectidas no Plan e que consideramos que deben de estalo».
«Así mesmo, un Plan tan relevante para a xestión cultural da nosa cidade debe conter unhas directrices básicas coma garantir o uso e fomento da lingua galega, velar pola accesibilidade total en todas as programacións e actividades e garantir a independencia de programación de todos os espazos culturais dependentes do Concello para que non se repitan censuras ou vetos políticos».
«No mesmo senso, blindar a xestión pública de todos os espazos municipais e dotar de persoal suficiente á area de cultura con cuestións importantes que deben estar reflectidas no Plan e así o reseñamos nas nosas achegas».
«Por último, gustaríanos que o Plan Estratéxico se complementara, pois contempla gastos noutras áreas coma persoal ou urbanismo, pero non se especifica coma se debería afrontar nestas concellerías».
«Doutra banda, este Plan Estratéxico é moi ambicioso e temos serias dúbidas sobre coma se vai poñer en marcha, sobre todo en tema de orzamento e persoal, pois a area de cultura non goza nin do un, nin do outro».
Dende FeC «sempre apostamos polo fomento e impulso da cultura, e a nosa xestión durante o noso goberno aválanos, por iso adoptamos unha postura de predisposición de cara a aprobar este amplo documento, avogando sempre por un consenso participado co tecido cultural da cidade e quedando vixiantes sobre coma se vai poñer en marcha e o seu cumprimento».
