Cedeira impulsa cursos de formación para incentivar o emprego

O Concello de Cedeira organiza a través da concellería de Promoción Económica e Emprego catro cursos gratuítos que teñen como finalidade mellorar a formación das persoas participantes e fomentar o emprego.

Xunto cun curso de galego, que comezou o pasado venres 5, en vindeiras datas impartiranse outros de atención sociosanitaria a dependentes, monitor de tempo libre e hostalería. Os prazos de inscrición e datas dos programas daranse a coñecer a través do “Cedeira Informa”.

O curso de “Atención Sociosanitaria a persoas dependentes en institucións sociais” vai dirixido a capacitar ás persoas participantes dos coñecementos e habilidades necesarias para poder desempeñar o coidado e atención adecuada das persoas usuarias destes servizos.

O curso de monitor ou monitora de tempo libre que se vai impartir, segundo informan desde a concellería de Emprego, ten a consideración de curso de primeiro nivel, segundo o Decreto 50/2000, do 20 de xaneiro, polo que se refunde e actualiza a normativa vixente en materia de xuventude.

Por último, o curso de hostalería é un programa orientado a capacitar cos coñecementos necesarios para traballar no servizo dun bar ou unha cafetería, procurando unha resposta á alta demanda de persoal especializado no sector da restauración.

O goberno local de Cedeira quere facer unha aposta polo emprego impulsando a capacitación de persoas desempregadas que terán, a través da formación, mellores condicións para acceder a postos de traballo en sectores demandantes, como son neste caso a hostalería ou os coidados sociosanitarios.

Lea también

A Oficina de Turismo de Fene reabre as súas portas

O Concello de Fene abriu esta semana a súa Oficina de Información e Turismo (OIT), …