Se reanuda en San Sadurniño a prestación do servizo de Educación familiar

O Servizo de Educación familiar do Concello de San Sadurniño encárgase das actividades e programas socioeducativos dirixidos ós pais e ós seis  fillos, co obxectivo de fomentar unha aprendizaxe mutua que beneficie tanto a convivencia como o desenvolvemento das menores desde bebés ata ben pasada a adolescencia.

Neste sentido, o departamento organiza anualmente as Escolas de familias, o antigo Preescolar na casa, e  obradoiros relacionados coa comunicación ou coa prevención de condutas aditivas de todo tipo, sen contar con que os programas que leva a cabo tamén se coordinan sempre coas áreas de Igualdade e de Servizos Sociais.

Nos últimos anos o servizo de Educación familiar ampliou o seu labor traballando de maneira intensa e non sempre visible na atención, apoio e seguimento da situación de persoas en risco de exclusión, así como na abordaxe de casos de violencia de xénero e doutras situacións que precisan unha intervención inmediata e un acompañamento posterior no que teñen tanto valor os coñecementos técnicos para a busca de recursos axeitados como a capacidade de empatizar coas persoas que precisen a axuda profesional.

Trala creación da bolsa de emprego de Educación familiar para a cobertura de baixas ou ausencias da técnica titular, o Concello xa acudiu a ela para facer o primeiro chamamento convocando para contratación (segundo os criterios de funcionamento da lista) á Educadora social Verónica Pérez Calvo.

A técnica está dispoñible polas mañás no horario de atención ao público das oficinas municipais. Pódese concertar cita ou facer consultas telefónicas a través do 981 490 027.