Galicia Ártabra Noticias de Ferrol y la comarca de Ferrolterra.
Baixo o patrocinio da Deputación da Coruña, o naturalista e socio fundador do antigo Grupo Ornitolóxico Galego e da SGHN, Xosé Manuel Penas Patiño, ofrecerá este sábado día 4, pola mañá unha conferencia titulada «A moratoria da caza de baleas en Galicia». A cita, organizada dentro do ciclo de conferencias «Xuntanzas Naturalistas» da Delegación de Ferrol baixo o patrocinio da Deputación da Coruña, será ás 11:00 horas no salón de actos do Museo de Historia Natural en Ferrol.Xosé Manuel Penas Patiño ten unha recoñecida traxectoria como ornitólogo e divulgador, sendo coautor da primeira guía de aves de Galicia en galego. Foi precursor no seguimento dos cetáceos nas costas galegas e da súa caza dende as factorías de Caneliñas e Morás, último reduto dunha etapa de intensas capturas que non respectaban os cupos oficiais e comprometían o futuro dos grandes cetáceos.
Patiño falará na súa conferencia sobre o papel que a SGHN xogou nesta época decisiva evocando as accións de investigación, divulgación e protección que caracterizan á entidade, así como a colaboración naquel tempo cun incipiente Greenpeace. A participación na conferencia non require inscrición previa e é de balde por vir patrocinada pola Deputación da Coruña, pero a entidade lembra que o aforo é limitado.
