O Pazo do Piñeiro abre ao público polas Letras Galegas grazas á AIC

As xestións feitas pola Agrupación Instrutiva de Caamouco AIC permitirán a apertura ao público do Pazo do Piñeiro, situado no Outeiro de Barracido. Será nunha xornada histórica, no marco da Ruta das Letras Galegas, prevista para o vindeiro 21 de maio, organizada conxuntamente coa AVV de Limodre

A Xunta Directiva da Agrupación leva anos considerando preciso achegar o Pazo á veciñanza de Caamouco. «Unha misión que, máis alá de cuestións históricas e patrimonias, responde á necesidade de conectar as novas xeracións cun espazo ao que estiveron vinculadas por motivos varios os seus antepasados», apunta Dani García, presidente da Agrupación.

Con este obxectivo, a Agrupación enviou no pasado mes de marzo unha carta aos actuais propietarios do inmoble que, acto seguido, tiveron a ben recibir unha representación da Sociedade na Coruña. Nesa xuntanza, a Agrupación presentouse como unha entidade que vén avalada por décadas de intenso traballo a prol da dinamización social e cultural de Caamouco.

Ao mesmo tempo, trasladóuselles unha proposta concreta da iniciativa que se pretende desenvolver nesas instalacións neste mes de maio.

O encontro resultou máis que positivo. Por unha banda, a Agrupación conseguiu que o Pazo abra as súas portas para a actividade das Letras Galegas deste ano. Pola outra, adquiriu o compromiso dos seus propietarios para seguir traballando nesta liña de colaboración, coa posibilidade de desenvolver neste inmoble novas accións culturais no futuro.

O Pazo nas Letras Galegas

Para a conmemoración do Día Das Letras Galegas a Agrupación Instrutiva de Caamouco e a AVV de Limodre están a traballar nunha nova edición da ruta ‘Camiños das Letras’, que contou cunha resposta inmellorable na súa primeira edición celebrada o ano pasado.

Trátase dunha ruta teatralizada entre as dúas parroquias. Os actores da Tenencia Teatro, baixo a dirección de Eugenia Sanmartín, acompañarán os camiñantes por un percorrido co que se pretende poñer en valor o patrimonio histórico e cultural dos dous territorios. Este ano, o principal reclamo da ruta será o Pazo do Piñeiro, para onde se está a traballar nunha posta en escena moi especial.

Na actividade poderán participar un máximo de 80 persoas. O prazo de inscrición abrirá o vindeiro luns, 8 de maio, a través do número 616 74 02 05.