Galicia Ártabra Digital Noticias de Ferrol y la comarca de Ferrolterra.
«Ahora, máis que nunca, a defensa dos valores polos que loitou toda a súa Pablo Iglesias é de vital importancia”. Así comezou a súa intervención a candidata número 3 ao Parlamento, Beatriz Sestayo, que compareceu en rolda de prensa onte para dar a coñecer unha iniciativa promovida polo PSOE de Ferrol que nace agora, pero que terá continuidade ao longo dos anos: a Festa da Rosa, que nesta cidade, a do fundador do partido, estará profundamente vencellada á súa figura.
A candidata quixo deixar claro que a pesares do seu nome, a iniciativa xurde cun marcado espírito reivindicativo, “o mesmo que caracterizou a Pablo Iglesias e que nestes momentos de recortes de dereitos fundamentais por parte do Partido Popular, é fundamental recuperar”. E qué mellor homenaxe ao fundador do PSOE que facer a Festa da Rosa que o día 18 de outubro, a data do seu nacemento. “Queremos destacar os valores que caracterizaron ao noso fundador e veciño, a ética, a verdade e a dignidade, tan lonxanos do que os Gobernos de Mariano Rajoy e Alberto Núñez Feijóo nos teñen acostumados”, manifestou Sestayo, que informou de que este ano a Festa servirá como peche de campaña electoral na cidade, se ben a data manterase no tempo “por ser a máis axeitada cos obxectivos cos que a iniciativa nace”.
A Festa da Rosa terá lugar en FIMO o xoves 18, a partires das 21.30 horas, e consistirá nunha cea e nunha serie de intervencións políticas. Tampouco faltarán as homenaxes –cada ano a agrupación local destacará a figura dalguna persoa vencellada ao socialismo na cidade-, aínda que Sestayo non quixo desvelar máis datos porque “queremos que sexan unha sorpresa”. Para esta primeira edición, está prevista a asistencia do candidato á Presidencia, Pachi Vázquez, así como do secretario xeral do PSM, Tomás Gómez.
As persoas interesadas en acudir a esta primeira Festa da Rosa poderán inscribirse no local de campaña dende mañá venres, tanto en horario de mañá como de tarde, ata dous días antes da cita. O prezo por persoa é de 15 euros e a cea consistirá en dous pratos e postre.
