Galicia Ártabra Digital Noticias de Ferrol y la comarca de Ferrolterra.
A escritora naronesa María Isabel Ramos Breijo presentará seu libro “Hasta el infinito y más allá” o vindeiro 3 de agosto na biblioteca municipal.
Así o anunciou a concelleira de Ensino e Bibliotecas, Mercedes Taibo, que indicou que o acto de presentación, que será aberto á asistencia da cidadanía en xeral, ata esgotar a capacidade da sala multiusos, terá lugar ás 19.00 horas.
A autora comezou a publicar os seus primeiros relatos na revista “Amigos de la poesía y la literatura de Narón” e colaborou en obradoiros literarios como “Pluma encendida”. O seu novo libro, “Hasta el infinito y más allá”, recolle vinte e tres relatos curtos de temática diversa. Editado por Círculo Rojo, as ilustracións son de Dolores Breijo Santiago e Sabela Castrillón Ramos, nai e sobriña, respectivamente, da autora.
O amor de Ramos Breijo pola literatura espertou na súa infancia coa lectura de obras de aventuras e os seus intereses foron mudando na súa xuventude cara á novela negra sueca de autores como Camilla Läckberg, Henning Mankell e Stieg Larsson.
