Éxito dunha nova edición da Alteada, en Xuvia, Narón

A parroquia de Xuvia acolleu este domingo unha nova edición da Alteada, na que se conmemorou a cuarta edición da Festa da ameixa rubia. O Concello e a AVV Altea, da citada parroquia naronesa, organizaron a convocatoria, que incluíu un completo programa de actividades e actuacións musicais dirixidas a públicos de todas as idades. A entidade veciñal esgotou a finais desta semana os 250 tickets que puxo á venda para poder degustar o menú que se serviu a mediodía baixo unha carpa ubicada na zona do paseo marítimo de Xuvia.

Ás 13.00 horas iniciouse a sesión vermú, a cargo dun dúo que animou o inicio da xornada previa á degustación gastronómica. Ás 15.00 horas comezou a servirse o menú, cun primeiro plato de ameixas e churrasco de segundo –cun menú tamén infantil, de balde para menores de 12 anos- e que continuou con
bola de sobremesa e bebidas.

A festa continuou pola tarde, dende as 17.00 horas, cunha nova actuación musical baixo a carpa e previamente, ás 16.00, deu comezo unha sesión de
xogos tradicionais, dirixida a menores e tamén a público adulto. A programación incluía a partir das 18.00 horas unha actuación do músico Paco
Nogueiras, para público infantil e a última hora da tarde, ás 19.00 horas, tivo lugar a Festa da Escuma.

O Concello e a AVV Altea organizaron un ano máis esta convocatoria festiva co fin de exaltar un dos produtos típicos da ría, a ameixa rubia, cocinándose para a ocasión un total de cen quilos.