Galicia Ártabra Digital Noticias de Ferrol y la comarca de Ferrolterra.
Olaia Ledo, membro da executiva nacional do BNG e portavoz municipal en Narón repetirá como candidata do BNG na octava poboación do país se, no vindeiro consello nacional do BNG do 18 de xuño, aproban a que xa é a proposta en firme da asemblea naronesa. O bloque convértese así «na primeira organización da localidade en decidir oficialmente a vindeira candidata ás eleccións municipais»
Marta Grandal, responsábel local, presentou a proposta saída do consello da formación para que a militancia nacionalista votase e, o concelleiro Geno Carballeira, quen explicou á que considera «a mellor candidata que pode ter Narón e o BNG. Traballadora, con criterio e cun proxecto firme e necesario para Narón».
«Os que traballamos con ela só podemos dicir que aprendemos todos os días de como facer política de altura, que nos fai ser mellores e que sempre está para que avancemos, sacarnos da zona de confort e todo para que Narón e Galiza sexan mellores» «Ademais, coñece cada recuncho deste concello e aóseu lado sabes que imos gañar o futuro para todas as naronesas e naroneses” indica Geno Carballeira. A proposta saíu con todos os votos a favor.
Olaia Ledo Díaz
Militante nacionalista desde os 17 anos, forma parte da Executiva Nacional do BNG desde o 2016, formando parte da estratexia actual do BNG e do ascenso electoral nacionalista desde que Ana Pontón é portavoz. Con ela, nas pasadas eleccións o BNG da localidade subiu en votos e en porcentaxe dándolle á volta á tendencia de oito anos de baixadas electorais.
Nestes tres anos como portavoz municipal, o BNG no concello de Narón «defendeu numerosas propostas como a creación dun CIM (Centro de Información á Muller), coidado do patrimonio, melloras laborais nas empresas municipais, ser Narón parte da entidade de “cidades que camiñan”, accesibilidade universal, actuacións directas sobre o espazo público, promover o deporte de base ou poñer o foco na atención a domicilio en Narón entre moitas outras»
Ademais, o BNG da localidade «asumiu campañas de traballo na rúa e accións como a limpeza do río Xuvia e da ría, alegacións a parques eólicos que afectan a Narón ou recollida de sinaturas para mellorar os servizos do centro de saúde e a creación dunha residencia de maiores pública para a cidade»
Traballadora autónoma no sector audiovisual e no marketing, participou na premiada película “Nación” preseleccionada ós Goya e Mestre Mateo como mellor documental no que ela foi directora de produción. Quenes a coñecen defínena «como inconformista, moi traballadora e tremendamente optimista»
