Galicia Ártabra Noticias de Ferrol y la comarca de Ferrolterra.
Os pais que solicitaron por primeira vez a admisión dos seus fillos , de 0 a 3 anos, nas escolas infantís municipais da Solaina, A Gándara ou Piñeiros para o curso 2022/2023 poden consultar os listados provisionais a través da páxina web do Concello de Narón (http://www.naron.es/web/cat/gal/concello/escuelas_infantis/), nas propias escolas infantís e tamén no Concello, a través do Rexistro Municipal (na entrada) ou do Servizo Sociocomunitario (no primeiro andar).
A edil de Ensino, Mercedes Taibo, informou que se abre un prazo de reclamacións a este listado provisional, que remata o vindeiro 14 de maio e que se poden tramitar a través do Rexistro municipal, de 8.30 a 13.30 horas de luns a venres, e tamén na Sede Electrónica do Concello de Narón
Para o vindeiro curso escolar rexistrouse lista de agarda na opción de 1 a 2 anos das tres escolas infantís municipais, tal e como indicou Taibo. A concelleira explicou que unha vez rematado o prazo de exposición pública para realizar alegacións procederase a elaborar as listaxes definitivas para, posteriormente, formalizar as matrículas do vindeiro curso.
As escolas infantís municipais abren as súas portas en horario de 7.30 a 20.00 horas.
